„ჯავახური ლექსიკის“ პრეზენტაცია ახალციხეში

გიორგი ზედგინიძე 1922 წლის 10 ივლისს, ბორჯომის რაიონის სოფელ ბალანთაში დაიბადა. პროფესიით ფილოლოგმა, ჯავახური ლექსიკის დიალექტის შეგროვება 17 წლის ასაკში დაიწყო. მუშაობდა ახალდაბის სკოლა სანატორიუმში დირექტორად, ასევე წლების განმავლობაში იყო ბორჯომში მეოთხე საშუალოს სკოლის დირექტორი. აღნიშნული სკოლა დღემდე გიორგი ზედგინიძის სახელს ატარებს.

გიორგი ზედგინიძე არაერთი რომანის, დრამისა და პატრიოტულ მოტივზე დაწერილი ლექსის ავტორია. ჩატარებული აქვს ისტორიული და ეთნოგრაფიული კვლევები. 1984 წელს მესხეთის სახელმწიფო თეატრში მისი ერთ–ერთი დრამაც დაიდგა.

იგი 1994 წელს, 72 წლის ასაკში გარდაიცვალა. მისი ერთ–ერთი ყველაზე მნიშვნელოვანი წიგნის გამოცემა გარდაცვალებიდან 20 წლის შემდეგ მოხერხდა.

„ჯავახური ლექსიკა“ ერთ–ერთი ყველაზე დიდი ნაშრომია, ამ წიგნში დაახლოებით 28 ათასი სიტყვაა. ეს სიტყვები დღეს აღარ გამოიყენება. ის ადამიანები, ვისგანაც მამა ინიშნავდა ამ ყველაფერს, მეცხრამეტე საუკუნის მოღვაწეები იყვნენ“, – ამბობს გიორგი ზედგინიძის შვილი ვლადიმერ ზედგინიძე, რომლის ინიციატივითა და სახსრებით გამოიცა აღნიშნული წიგნი.

ვლადიმერ ზედგინიძეა აღნიშნული წიგნის რედაქტორიც.

პრეზენტაციას მწერლის ოჯახის წევრების გარდა, სასწავლებლის პროფესორ–მასწავლებლები, სტუდენტები და მოწვეული სტუმრები ესწრებოდნენ.

„ჯავახური ლექსიკის“ მორიგი პრეზენტაცია 2 დეკემბერს, ახალციხის ცენტრალურ ბიბლიოთეკაში იგეგმება, შემდეგ კი დაგეგმილია თბილისში, ხელნაწერთა ინსტიტუტსა და ბორჯომში.



[თინათინ ზაზაძე, ახალციხე]