ადიგენში ”ქართული ოცნების” აქტივისტი სამსახურიდან გაათავისუფლეს

ადიგენის საავადმყოფოს ”უნიმედი სამცხეს” და ასევე სასწრაფო სამედიცინო სამსახურის ექიმს ინა კაპანაძეს შეწყვეტილი შრომითი ხელშეკრულება აღარ გაუგრძელეს. ყოფილი ექიმის განცხადებით, მისი სამსახურიდან გათავისულფების მიზეზი განსხვავებული პოლიტიკური შეხედულებები იყო.

- ”მას შემდეგ რაც ცნობილი გახდა, რომ ”ქართულ ოცნებასთან” კავშირში მოვიაზრებოდი, ადიგენის საავადმყოფოს მენეჯერი, ლალი ბალახაშვილი მოვიდა ჩემთან სახლში, თქმა ძალიან ერიდებოდა და თითქმის თხოვნით მითხრა, რომ სამსახური უნდა დამეტოვებინა. მიზეზი ის იყო, რომ მას ჩვენი სადაზღვევო კომპანიის ”ალდაგი ბი-სი-აი-ს” გენერალურმა დირექტორმა ეკა შავგულიძემ დაურეკა და უთხრა, რომ თუ მე სამსახურიდან არ გამათავისულფებდნენ კომპანიას პრობლემები შეექმნებოდა”, - გვიყვება კოალიცია ”ქართული ოცნების” ადიგენის შტაბის წევრი ინა კაპანაძე.

ამდენად მას, პირველი ივლისიდან, შეწყვეტილი ხელშეკრულება აღარ გაუგრძელეს.

- ”ოფიციალურ წერილით მაცნობეს: ხელშეკრულების ვადის გასვლის გამო გათავისულფლებული ხართ დაკავებული თანამდებობიდან”, - ამბობს კაპანაძე, რომელიც ადიგენის საავადმყოფოს სამშობიარო განყოფილებაში ექიმ ნეონატოლოგად და ასევე სასწრაფო სამედიცინო დამხარების სამსახურში ექიმად თითქმის 10 წელი მუშაობდა.

კაპანაძეს მას შემდეგ საავადმყოფოს ხელმძღვანელობისთვის სამსახური აღარ უთხოვია: ”ეს ისეთი რეგიონია, რომ არ ღირდა. თან რა მაქვს სათხოვარი, საავადმყოფო იმის გამო კიარ დამატოვებინეს, რომ სამსახურეობრივ მოვალეობას ვერ ვართმევდი თავს და პაციენტი მყავდა უკმაყოფილო. არამედ იმიტომ, რომ განსხვავებული პოლიტიკური შეხედულებები მაქვს”.

კაპანაძის განცხადებით, მაშინ როცა ის საავადმყოფოდან გაათავისუფლეს ”ქართული ოცნების” აქტიური წევრი არ იყო, მის შესახებ მხოლოდ ის იცოდნენ, რომ მას თბილისში, ”ქართული ოცნების” ოფისში სთხოვდნენ ჩასვლას: ”ჩემთან გასაუბრება უნდოდათ. ამის შესახებ ადგილობრივი ხელისუფლებისთვის იმ არასაიმედო ხალხისგან გახდა ცნობილი, რომლებიც ”ქართულ ოცნებაში” იყვნენ გაწევრიანებული”.

”უნიმედი სამცხეს” მენეჯერის ლალი ბალახაშვილის განცხდებით, კაპანაძის სასმახურიდან გათავისუფლების მიზეზი შრომითი ხელშეკრულების ვადის ამოწურვა იყო: ”სხვა თანამშრომლებსაც შეუწყდათ ხელშეკრულებები და აღარ გავუგრძელეთ, თუმცა ეს იყო სხვა და სხვა დროს”.

კითხვებზე, რამდენი ექიმი გაათავისუფლეს სამსახურიდან, ან რა იყო იმის მიზეზი, რომ მათ შეწყვეტილი ხელშეკრულებები აღარ გაუგრძელდათ, ბალახაშვილმა გვიპასუხა: ”სხვა არაფრის თქმა აღარ მსურს”.

[თამუნა უჩიძე, ადიგენი]