ექიმმა ”ალდაგს” სასამართლო პროცესი მოუგო

დავა შრომით ანაზღაურებას ეხებოდა. სასამართლოს გადაწყვეტილებით ”ალდაგი” ხაბეიშვილს ორი თვის ხელფასს აუნაზღაურებს.

ახალციხის საავადმოფოს ყოფილმა ექიმმა სასამართლოში საჩივრის შეტანა მას შემდეგ გადაწყვიტა, რაც იგი სამსახურიდან გაათავისუფლეს. ბრძანება იმის შესახებ, რომ ხაბეიშვილს საავადმყოფოში ყველა დაკავებული თანამდებობა უნდა დაეტოვებინა, მიმდინარე წლის 14 თებერვალს მიიღეს.

ყველაფერი კი ახალციხის საავადმყოფოში ”ალდაგის” შვილობილი კომპანიის ”ჩემი ოჯახის კლინიკის” შესვლის შემდეგ დაიწყო: ახალმა ხელმძღვანელობამ მედ პერსონალთან შრომითი ხელშეკრულებები 6-თვიანი ვადით 15 სექტემბერს გააფორმა. მის თანახმად საავადმყოფოს თანამშრომლები ანაზღაურებას ბოლო ერთი წლის განმავლობაში მიღებული ხელფასის საშუალო ოდენობით აიღებდნენ. რადგან შეთავაზება მისაღები იყო, ექიმებმა ხელშეკრულებას ხელი მოაწერეს. თუმცა, ხელშეკრულების ვადის გასვლამდე, პირველ დეკემბერს თანამშრომლებს ხელის მოწერა ახალ შრომით ხელშეკრულებაზე მოსთხოვეს.

-”ამ ხელშეკრულებით მათ ყევლაფრის უფლება ჰქოდნათ. ეს იყო ტრეფიკინგი და არა ხელშეკრულება. გავაპროტესტე და ხელი არ მოვაწერე. იმ ანაზღაურების პირობებს რაც იქ იყო მითითებული არასდროს დავეთანხმებოდი”, - ამბობს ხაბეიშვილი.

მასთან ერთად პროტესტი გამოხატა კიდევ 16-მა ექიმმა, რის გამოც, როგორც ხაბეიშვილი ამბობს, მაშინ საავადმყოფოს მენეჯერი დავით მაისურაძე გაათავისუფლეს. ახალი დავალებით - 17 მედ პერსონალს ხელშეკრულებაზე ხელი მოეწერა, ან ისე გაეშვათ სამსახურიდან, რომ კომპანიას არ ეზარალა, ახალი ხელმძღვანელი დანიშნეს. მუქარითა და ძალდატანებით 16-მა ექიმმა ხელშეკრუელბას ხელი მოაწერა, ხაბეიშვილი კი მეორე დღესვე სამსახურიდან გამოუშვეს.

მან ერთი თვის ვადაში, სასამართლოს მიმართა მოთხოვნით აენაზღაურებინათ იმ ორი თვის ხელფასი, რომელიც მას 15 სექტემბერს ხელმოწერილი ხელშეკრულებით ეკუთვნოდა. ამ ორი თვის განმავლობაში კომპანია ხაბეიშვილს ანაზღაურებას იმ ხელშეკრულებით უხდიდა, რომელზეც ხელი მოწერილი არ ჰქონდა.

სასამართლომ ხაბეიშვილის მოთხოვნა დააკმაყოფილა. თუმცა, რაც შეეხება საჩივრის მეორე ნაწილს, სადაც სამსახურიდან გათავისუფლების გამო ექიმი კომპენსაციას ითხოვდა, გათვალისწინებული არ იქნა.

-”თუ გაასაჩივრებენ ახალციხის რაიონული სასამართლოს გადაწყვეტილებას, მაშინ მეც გავასაჩივრებ იმას, რომ მეორე ნაწილი არ დაგვიკმაყოფილეს. ასევე მოვითხოვ მორალური ზიანის ანაზღაურებასაც. თუ არ გაასაჩივრებენ, მაშინ მე და ჩემი ადვოკატიც თავს შევიკავებთ”, - ამბობს ხაბეიშვილი.

მისი ადვოკატის ეკატერინე აბაშიძის განცხადებით, ჯერ კიდევ პროცესის მოგებამდე საავადმყოფოს მედ პერსონალი მას არა ერთხელ დაუკავშირდა: ”ვინაობას არ დავასახელებ, მაგრამ ისევე როგროც ხაბეიშვილი შრომის ანაზღაურებას ისინიც ითხოვენ”.

თამაზ ხაბეიშვილი ახალციხის რაიონული საავადმყოფოდან გათავისუფლების შემდეგ სამედიცინო დაწესებულებაში ”ნათია 777” კარდეოლოგად და თერაპევტად მუშაობს.

[თამუნა უჩიძე, ახალციხე]