ახალციხის მერმა პედაგოგებს პროფესიული დღე წინასწარ მიულოცა

ახალციხის სკოლების პედაგოგებს ახალციხის მერიაში უმასპინძლეს. ვინაიდან მასწავლებლის დღე, 5 ოქტომბერი, არასამუშაო დღეა, ქალაქის მერიამ პედაგოგებთან შეხვედრა ორი დღით ადრე, 3 ოქტომბერს გადაწყვიტა.

17 – მდე პედაგოგს გაწეული პედაგოგიური მოღვაწეობისთვის სამადლობელი სიგელი და წიგნები ქალაქ ახალციხის მერმა გიორგი კოპაძემ გადასცა.

„მოვიწვიეთ ღვაწლმოსილი პედაგოგები, რომლებსაც დიდი დამსახურება აქვს ჩვენი ქალაქის, სკოლებისა და მოსწავლეების წინაშე და ჩვენი პატივისცემა მცირედი საჩუქრებით გამოვხატეთ“, – განაცხადა ახალციხის მერმა გიორგი კოპაძემ და პირობა დადო, რომ სამომავლოდ, პედაგოგების შრომა აუცილებლად დაფასდება, – „რადგან ისინი არიან ის ადამიანები, რომლებიც მომავალ თაობას ზრდიან“.

კერძო სკოლის „მზექას“ პედაგოგმა გურამ თაქთაქიძემ კი აღნიშნა, რომ კარგი იქნება იმ მასწავლებლების შრომაც დააფასონ, რომლებიც წლების განმავლობაში სკოლაში მუშაობდნენ და დღეს სახლში არიან: „სასიამოვნოა, როცა ხელმძღვანელობას ვახსოვართ. ყველა პედაგოგს ვულოცავ მასწავლებლის დღეს, განსაკუთრებით იმ პედაგოგებს, რომლებმაც თავის ცხოვრება სკოლას შესწირეს და დღეს სახლში ზიან. კარგი იქნება თუ მათი შრომაც დაფასდება“.



[მანანა სარაშვილი, ახალციხე]