ახალციხის მერიამ მასწავლებლებს პროფესიული დღე აღუნიშნა [Photo]

მასწავლებელთა საერთაშორისო დღე ახალციხის ციხის ტერიტორიაზე რესტორან „რაბათში“ აღნიშნეს. ღონისძიებაში ქალაქში არსებული ყველა სკოლა ჩაერთო.

ღონისძიებაზე მიწვეული კოლეგებისა და მერიის წარმომადგენლების წინაშე პედაგოგები სასაცილო და თეატრალური წარმოდგენებით წარსდგნენ. ხუმრობები ლარის კურსის ვარდნას, პედაგოგების დაბალ ხელფასსა და სკოლაში მომხდარ სასაცილო მომენტებს შეეხებოდა.

„ბავშვების სილაღე და ზრდასრული ადამიანის სიბრძნე მასწავლებელს ძალას აძლევს გაუმკლავდეს ყველაფერს“, – ამბობს მეხუთე საჯარო სკოლის მასწავლებელი ნინო თუმანიშვილი.

ახალციხის მერიის კულტურის სამსახურის განათლებისა და კულტურის განყოფილების უფროსის, მარინა მერაბიშვილის თქმით, ღონისძიებისთვის კულტურის სამსახურმა 2000 ლარამდე დახარჯა: „დღეს მასწავლებლების საერთაშორისო დღეა, ყველა პედაგოგს ვულოცავ ამ დღეს. მოწვეული გვყავს 60 პედაგოგი, მათ შორის, ღვაწლმოსილი და დამსახურებული პედაგოგები“.

ღონისძიების დასასრულს პედაგოგებს კულტურის სამსახურისგან სიმბოლური საჩუქრები, ვარდები და სუნამოები გადაეცათ.







[ ვარლამ წიკლაური, ახალციხე]