მასწავლებლის ეროვნული ჯილდოს მფლობელი ახალციხეში პედაგოგებს შეხვდა

ლადო აფხაზავას შეხვედრა პედაგოგებთან, ახალციხის დემოკრატიული ჩართულობის ცენტრში მოეწყო. ეროვნული ჯილდოს მფლობელმა მასწავლებლებს, კონკურსის შესახებ ესაუბრა და მასში ჩართვისაკენ მოუწოდა–„ჩემი აქ ჩამოსვლის მიზანი, პედაგოგების გაცნობა და საკუთარი გამოცდილების გაზიარება იყო. მინდა თითოეულ მათგანს ვუთხრა რომ აუცილებლად გააგზავნონ, მომავალ წელს კონკურსზე აპლიკაციები, რადგან ეს ნიშნავს რომ ჩვენ, ჩვენი პროფესიის პოპულარიზაციას ვუწყობთ ხელს.“

მასწავლებლის ეროვნული ჯილდოს მფლობელმა კოლეგებს, საკუთარი გამოცდილებაც გაუზიარა და იმ პროექტებზე ესაუბრა, რაც სამოქალაქო განათლების კუთხით მოსწავლეებთან ერთად განახორციელა. მისი თქმით, ყველა მასწავლებელი უნდა ეცადოს, მოსწავლეებს ის, უნარ–ჩვევები ჩამოუყალიბოს, რაც მათ ცხოვრებაში გამოადგებათ.

„მოსწავლეები სამომავლოდ, ბევრი გამოწვევების წინაშე დგებიან, ამიტომ მე ვცდილობ მოვამზადო ისინი მომავლისთვის, ჰქონდეთ ის უნარჩვევები, რაც საზოგადოებაში ინტეგრაციისათვის აუცილებელია,“–განაცხადა მასწავლებლის ეროვნული ჯილდოს მფლობელმა ლადო აფხაზავამ.

პედაგოგებთან შეხვედრა, სამცხე–ჯავახეთის სამოქალაქო განათლების პედაგოგთა ფორუმისა და ახალციხის ახალგაზრდული ცენტრის ორგანიზებით მოეწყო.

„შეხვედრის ჩატარების მიზანი იყო, ლადო აფხაზავას პეტაგოგებისთვის ეთქვა თუ რა მიღწევებისთვის მიიღო მასწავლებლის ეროვნული ჯილდო, რათა მათაც გაუჩნდეთ მოტივაცია მომავალ წელს ჩაერთვნენ ამ კონკურსში“,–გვითხრა სამცხე–ჯავახეთის სამოქალაქო განათლების პედაგოგთა ფორუმის რეგიონული საბჭოს თავმჯდომარემ ნინო ნადირაძემ.

დღევანდელ შეხვედრას, ახალციხის მუნიციპალიტეტის მერიის წარმომადგენლებიც ესწრებოდნენ, რომლებმაც მასწავლებლის ეროვნული ჯილდოს მფლობელს სიმბოლური საჩუქარი გადასცეს.

„მასწავლებლის ეროვნული ჯილდო“ კოალიცია „განათლება ყველასათვის - საქართველოს“, მასწავლებელთა პროფესიული განვითარების ეროვნული ცენტრისა და განათლების სამინისტროს შორის გაფორმებული მემორანდუმის საფუძველზე, 2017 წლის 13 მაისს დაწესდა. იგი არის გლობალური კამპანიის The Global Teacher Prize ნაწილი და მიზნად ისახავს წარმატებული მასწავლებლების გამოვლენას, საზოგადოებისთვის მათ წარდგენას და პროფესიის პოპულარიზაციას.

ჯილდოს გამარჯვებული შემდეგი კრიტერიუმების მიხედვით გამოვლინდა: მოსწავლეების სწავლის შედეგების დინამიკა; სწავლების ინოვაციური და ეფექტური მიდგომების გამოყენება; ზოგადსაკაცობრიო მოქალაქეობრივი ღირებულებებისა და პრინციპების სწავლება; საზოგადოებერივი აღიარება და სამოქალაქო აქტივობა; პროფესიული განვითარება და გამოცდილების გაზიარება.



[ლუბა გიორგაძე, ახალციხე]