ფინანსთა მინისტრმა ახალციხეში მრავალშვილიანი ოჯახი მოინახულა

ნოდარ ხადურმა კვახაჯელიძეების ოჯახი დაახლოებით ნახევარი საათის წინ დატოვა. 11–სულიან ოჯახს მინისტრმა საჩუქრად პროდუქტი, ტანსაცმელი და ტელევიზორი გადასცა.

„მერიიდან დაგვირეკეს და გვითხრეს, მინისტრი მოდის და რომელიმე სოცილაურად დაუცველ ოჯახს უნდა ესტუმროსო. ალბათ ჩვენ შეგვარჩიეს, რადგან 7 შვილი მყავს და სოციალურად დაუცველებიც ვართ“, - ამბობს ოჯახის დიასახლისი მეგი თათეშვილი.

მისი თქმით, მინისტრმა ახალციხის მერთან გიორგი კოპაძესთან ერთად მათთან დაახლოებით 20 წუთი დაჰყო: „ძალიან გაგვიხარდა. გვესაუბრა, ჩვენი მდგომარეობით დაინტერესდა. ბავშვების ნახატებსა და სიგელებს სურათები გადაუღეს“.

კვახაჯელიძეების 11 სულიანი ოჯახი წლებია ოროთახიან ბინაში ცხოვრობს.

„ეს დედაჩემის სახლია, ჩვენ ბინა არ გვაქვს. მე, მეუღლე და 7 შვილი დედაჩემთან და მამაჩემთან ერთად ვცხოვრობთ, - ამბობს მეგი თათეშვილი და ამატებს, რომ მათი მთავარი პრობლემა სივიწროვეა,- 7 ბავშვს ერთ ოთახში სძინავს, განსაკუთრებით ზაფხულში სუნთქვაც კი ჭირს. მეცადინეობითაც ერთ პატარა მაგიდასთან 6 მოსწავლე ერთად ვერ ეტევა“.

თათეშვილი საბავშვო ბაღში ძიძად მუშაობს, მისი მეუღლე „კეთილმოწყობის“ სამსახურშია დასაქმებული.

„სოციალურად დაუცველების დახმარებასაც ვღებულობთ და თვეში დაახლოებით 700-800 ლარი გამოგვდის, მაგრამ ეს ძალიან ელემენტარული პრობლემების გადაჭრაშიც კი არ გვყოფნის“, - ამბობს მეგი თათეშვილი.

კვახაჯელიძეები ზამთარში შეშით თბებიან. გაზი შემოიყვანეს, თუმცა გამათბობელის შესაძენად სახსრები არ აქვთ, გარდა ამისა ამბობენ, რომ ზამთარში გაზის ფულის გადახდაც გაუჭირდებათ.

„მინისტრი დაგვპირდა, რომ „კარმას“ გამოგვიგზავნის. მანამდე კი შეშით დაგვეხმარებიან“, - გვითხრა მეგი თათეშვილმა.
11–სულიანმა ოჯახმა დაპირებები მერისგანაც მიიღო.

„გიორგი კოპაძემ გვითხრა, რომ სოციალურად დაუცველებისთვის ბინა გარემონტდება, იქ 24 ოჯახს შეასახლებენ და მათ შორის ერთ-ერთი ჩვენ ვიქნებით“, - ამბობს თათეშვილი.

მისივე თქმით, ქალაქის მერის განცხადებით, მომავალი წლიდან ბიუჯეტში სოციალურად დაცუველი სასკოლო ბავშვებისთვის თითოზე 200 ლარი იქნება გათვალისწინებული: „ეს ძალიან შეგვეშველება, წელს კრედიტი გამოვიტანე, რომ ბავშვები სკოლაში მიმეყვანა და მათთვის რაღაცა მეყიდა“.

მას შემდეგ, რაც მინისტრმა კვახაჯელიძეების ოჯახი დატოვა, დაახლოებით ნახევარ საათში მათ მინისიტრის დაპირებული შეშა მიუტანეს. დაპირებულ გაზის გამათბობელს, სასკოლოდ მომავალი წლიდან თითო ბავშვზე 200 ლარს და ბინას კი თათეშვილი სამომავლოდ ელოდება.

მინისტრის ვიზიტის შესახებ ფინანსთა სამინისტროსა და ქალაქ ახალციხის მერიაში ამ დრომდე კომენტარი არ კეთდება. მინისტრს სტუმრობისას ადგილობრივი მედია არ ახლდა, სამინისტროს პრესსამსახური „სამხრეთის კარიბჭეს“ ზარებს მთელი დღის განმავლობაში არ პასუხობდა, მიუხედავად იმისა, რომ ჯერ კიდევ გუშინ, 2 ოქტომბერს ვესაუბრეთ და ვიზიტის დეტალების გარკვევას დაგვპირდა. ახალციხის მერიის პრესსამსახურში კი აცხადებდნენ, რომ ვიზიტის შესახებ ინფორმაცია არ ჰქონდათ.

[თამუნა უჩიძე, ახალციხე]