"მესხური ფესტივალი 2014" შედგა [Video]

ფესტივალი 12:00 საათზე, მარათონით დაიწყო და ახალციხის ციხეში ადგილობრივი ანსამბლების კონცერტით, ხელნაკეთი ნივთებისა და ადგილობრივი პროდუქციის გამოფენით გაგრძელდა. პარალელურად, ციხის ტერიტორიაზე მიმდინარეობდა სხვადასხვა სპორტული ღონისძიებები.

დღის მეორე ნახევარში სცენა საპატიო ახალციხელებს დაეთმოთ. სხვადასხვა ორგანიზაციებმა დააჯილდოეს სპორტულ შეჯიბრებებში გამარჯვებული მონაწილეები. ფესტივალი "X ფაქტორის" გამარჯვებულის თორნიკე ყიფიანის კონცერტით უნდა დასრულებულიყო, თუმცა, მის ნაცვლად საღამო ნატო გელაშვილის კონცერტით დასრულდა.

ფესტივალს საფუძველი გასულ წელს ჩაეყარა. წელს ფესტივალის ორგანიზებაში ტელეკომპანიას სამცხე–ჯავახეთის სამხარეო ადმინისტრაცია, ახალციხის მერია და რეგიონის მუნიციპალიტეტის გამგეობები დაეხმარნენ. ფესტივალში ჩაერთო არაერთი ადგილობრივი ორგანიზაცია და მეწარმე. ფესტივალის საინფორმაციო მხარდამჭერი "სამხრეთის კარიბჭე" იყო.

[თამუნა უჩიძე, გიორგი ლონდარიძე, ახალციხე]