ახალციხე ‘მესხური ფესტივალისთვის’ ემზადება

„მესხური ფესტივალი“ ახალციხის ტელეკომპანია „მე–9 არხის“ ორგანიზებითა და „სამხრეთის კარიბჭეს“ საინფორმაციო მხარდაჭერით ეწყობა. ფესტივალში თითქმის ყველა ადგილობრივი ორგანიზაცია ჩაერთო.

„მესხური ფესტივალი“ 6 სექტემბერს სპორტული ღონისძიებებით დაიწყება. უკვე ცნობილია, რომ ფესტივალის ფარგლებში გაიმართება: ჭადრაკი, მკლავჭიდი, რაგბი, შაში, მიზანში სროლა, მინი–ფეხბურთი, მოტო–შოუ და ველორბოლა.

გარდა ამისა, ფესტივალის ფარგლებში, თოჯინების თეატრის მსახიობებიი გააცოცხლებენ შალვა ახალციხელს, თამარ მეფეს, შოთა რუსთაველს, ერეკლე მეფეს ასპინძის ომში – ყველა იმ გამოჩენილ ადამიანს, რომელიც კი მესხეთში მოღვაწეობდა, ან მნიშვნელოვანი როლი შეასრულა რეგიონის განვითარებაში.

ახალციხის ციხის ტერიტორიაზე გამოიფინება მესხური პროდუქცია: კვების პროდუქცია – ტენილი, ჩეჩილი და გუდის ყველი; თუთის ნაწარმი – არაყი, ტყლაპი, ბაქმაზი; ასპინძის სასაკლაოზე დამზადებული ხორც–პროდუქტები; სასმელები – ახალქალაქის ლუდი ბალისი, მინერალური წყალი – ფლატე, ბორჯომი, ლიკანი, მიტარბი; რეწვის ნიმუშები, თექაზე, ხეზე, რკინაზე დამზადებული სხვადასხვა ნამუშევრები, რაც რეგიონში მზადდება სხვადასხვა ადამიანების მიერ.

ქვედა ციხეში, ამფითეატრში, გაიმართება კონცერტი ადგილობრივი ფოლკლორული და ქორეოგრაფიული ანსამბლების მონაწილეობით.

ფესტივალის მიზანი მესხური კულტურისა და ტრადიციების პოპულარიზაცია და დამსვენებლებისთვის მესხეთის, როგორც უძველესი ისტორიისა და ტოლერანტობის მქონე რეგიონის გაცნობაა.

„მე–9 არხმა“ ფესტივალი გასულ, 2013 წელსაც მოაწყო. გასული წლისგან განსხვავებით, წელს ფესტივალი გაცილებით მასშტაბური, თან ორდღიანი იქნება. ფესტივალში მონაწილეობა ნებისმიერ მსურველს შეუძლია. დაინტერესებულმა პირებმა ტელეკომპანია „მე–9 არხს“ უნდა მიაკითხონ.

[ნინო ნარიმანიშვილი, ახალციხე]