ბორჯომში დაგეგმილი 5 ინფრასტრუქტურული პროექტიდან 2 ჯერ არ დასრულებულა

2014 წელს ბორჯომის მუნიციპალიტეტში ხუთი ინფრასტრუქტურული პროექტი დაიგეგმა. ბორჯომის მუნიციპალიტეტის დაბა ბაკურიანში გზების რეაბილიტაცია; ქალაქ ბორჯომში, 9 აპრილის ქუჩის რეაბილიტაცია და ცენტრალურ ისტორიულ პარკში არსებული საცურაო აუზის კეთილმოწყობა; ლიკანის დასახლებაში, გოგებაშვილისა და რაზმაძის ქუჩებზე ასფალტის საფარის მოწყობა; სოფელ მზეთამზეს გადასასვლელი ხიდიდან სოფლამდე მისასვლელი 2,0 კმ გზის მოასფალტება და ბეტონის საფარის მოწყობა; ასევე სოფელ ჩითახევსა და ქვაბისხევში გზების რეაბილიტაცია. აღნიშნული სამუშაოებისთვის რეგიონში განსახორციელებელი პროექტების ფონდიდან 2,698,468.00 ლარი გამოიყო.

ბორჯომის მუნიციპალიტეტის გამგეობაში განმარტავენ, რომ მიმდინარე წელს განსახორციელებელი პროექტებიდან სამი პროექტი უკვე დასრულებულია. ხოლო ბორჯომში, 9 აპრილის ქუჩისა და ბაკურიანის გზის რეაბილიტაცია ახლაც მიმდინარეობს. როგორც გამგებლის მოადგილე რევაზ კალაძე განმარტავს, 9 აპრილის ქუჩის რეაბილიტაციის პროექტით გათვალისწინებული ვადები საკურორტო სეზონის გამო გახანგრძლივდა.

"სეზონზე მოსახლეობის თხოვნა იყო და ამიტომ ცოტა ხნით სამუშაოები შეჩერებული იყო. ბაკურიანში საავტომობილო გზაზე სამუშაოების 80 პროცენტი შესრულებულია და პროექტი სავარაუდოდ რამდენიმე დღეში დასრულდება, რადგან უკვე ჯარიმებზე გადავიდნენ", – ამბობს რევაზ კალაძე.

რაც შეეხება 9 აპრილის ქუჩის რეაბილიტაციას, გამგებლის მოადგილის თქმით, სამუშაოები თვის ბოლომდე უნდა დასრულდეს. მისივე თქმით, ამავე პროექტით გათვალისწინებული საცურაო აუზის კეთილმოწყობა, რომელიც ცენტრალურ პარკში მდებარეობს, უკვე დასრულდა.

"მხოლოდ ვიტრაჟები დარჩა ჩასასმელი, თუმცა საცურაო აუზი 5 აგვისტოდან გახსნილია და ჩვეულებრივად ფუნქციონირებს", – განმარტავს კალაძე.

[თამარ თოთაძე, ბორჯომი]