81 წლის მიხეილ კენჭოშვილი სოციალურ დახმარებას ითხოვს

მიხეილ კენჭოშვილს ოთხი შვილი ჰყავს, მეუღლე ოთხი წლის წინ გარდაეცვალა. სახლი გაყიდა და როგორც თავად ამბობს ფული შვილებს მისცა. როცა მეუღლესთან ერთად ცხოვრობდა, სოციალურ დახმარებას ორივე იღებდნენ. მაგრამ მას შემდეგ რაც ცოტა ხნით შვილთან გადავიდა საცხოვრებლად, დახმარება მოუხსნეს.
ახლა დაბა ასპინძაში, ყოფილი ატეკის შენობის საყარაულო ოთახში ცხოვრობს. ამბობს, რომ ეს ოთახი შენობის მეპატრონემ დროებით დაუთმო.

„150 ლარი მაქვს პენსია, მაგრამ დახმარება მომიხსნეს. მიწა არ მაქვს, სახლი არ მაქვს, შვილები ჩემსკენ არ არიან“, – ამბობს იგი.

მიხეილ კენჭოშვილმა დახმარებისთვის სოცილაური მომსახურების სააგენტოს ასპინძის რაიონულ განყოფილებას განცხადებით არაერთხელ მიმართა. როგორც სააგენტოდან ბოლოს მიღებულ წერილშია განმარტებული, 2013 წლის აპრილის თვიდან შეუწყდა დახმარება, იმის გამო, რომ შემოწმების პერიოდში განაცხადში მითითებულ მისამართზე არ ცხოვრობდა. აქვე წერია, რომ სოციალურმა აგენტმა 2013 წლის ნოემბერსა და 2014 წლის იანვარში განმეორებით გადაამოწმა, თუმცა შესაბამისი ქულები ვერ მიიღო.

კენჭოშვილი სოციალური დახმარების შეწყვეტაში ასპინძის განყოფილებას ადანაშაულებს. განყოფილების უფროსის გულქან მელიქიძის თქმით, დახმარების დანიშვნას და შეწყვეტას განყოფილება არ წყვეტს.

„კენჭოშვილი გარკვეული პერიოდი შვილთან ცხოვრობდა ახალციხეში. ასპინძაში რომ დაბრუნდა, დაწერა განცხადება, მივიდა აგენტი, გადაამოწმა და ისევ დაენიშნა დახმარება. შემდეგ ისევ თავის შვილთან გადავიდა საცხოვრებლად. ახალციხიდან ჩვენი მონიტორის ჯგუფი ამოვიდა, ჩვენგან დამოუკიდებლად უფლება აქვთ მივიდნენ და შეამოწმონ. ვინაიდან კენჭოშვილი მითითებულ მისამართზე არ დახვდათ, შეადგინეს აქტი, შემდეგ ჩვენი აგენტი კიდევ ორჯერ მივიდა შემოწმებაზე და არც მას არ დახვდა. ამიტომ შეუწყდა დახმარება“, – განმარტავს გულქან მელიქიძე და ამატებს, რომ ერთი წლის განმავლობაში ხელახალი შემოწმების უფლება აღარ აქვთ.

[თამარ თოთაძე, ასპინძა]