ოჯახს, რომელიც პროტესტის ნიშნად შვილს სააგენტოში ტოვებდა, დახმარება არ ექნება

როლანდ ბახტურიძის ოჯახს სოციალური დახმარება დაახლოებით სამი თვის წინ შეუჩერდა. ოჯახმა დახმარების მოხსნა გააპროტესტა და 23 ოქტომბერს პირველი ჯგუფის ინვალიდი შვილი ადიგენის სოციალური მომსახურების სააგენტოში მიიყვანა. ბახტურიძეები ამბობდნენ, რომ შემწეობას თუ არ აღუდგენდნენ, შვილს სააგენტოში დატოვებდნენ. იმ დღეს სააგენტოში სასწრაფო დახმარების სამსახურისა და სამართალდამცველების გამოძახებაც დასჭირდათ. აურზაური დღის ბოლოს დასრულდა, სააგენტოს ხელმძღვანელმა ოჯახი დაარწმუნა, რომ პროტესტით არაფერი შეიცვლებოდა და ჯობდა სოციალური მომსახურების სააგენტოს დირექტორის ზაზა სოფრომაძის სახელზე წერილი გაეგზავნათ.

ბახტურიძეებმა წერილი მართლაც გააგზავნეს და დღის ბოლოს სახლში შვილთან ერთად დაბრუნდნენ.

მომხდარიდან მალევე, 28 ოქტომბერს, სოციალურმა აგენტმა ბახტურიძეების ოჯახი თავიდან გადაამოწმა. სააგენტომ ბახტურიძეებს პასუხი წერილობით გაუგზავნა.

„ოჯახში დამატებითი ვიზიტი განახორციელა განყოფილების უფროსმა სოც. აგენტმა თამაზ მაჭარაშვილმა 28 ოქტომბერს. ვიზიტისას გაირკვა, რომ დღეის მდგომარეობით ოჯახის სოციალურ–ეკონომიური და დემოგრაფიული მონაცემები იგივეა, რაც დაფიქსირდა სოც. აგენტ ანტონ აფრიამაშვილის მიერ 3 სექტემბერს შევსებულ ოჯახის დეკლარაციაში“, – ნათქვამია წერილში, რომელსაც სოციალური მომსახურების ადიგენის რაიონული განყოფილების უფროსი პეტრე აფრიამაშვილი აწერს ხელს.

ნანული ბახტურიძემ სააგენტოში თავისი ჯანმრთელობის მგდომარეობის შესახებ ფორმა N100 –იც წარადგინა, თუმცა, როგორც წერილშია განმარტებული, მისი დაავადება არ შეესაბამება მოქმედი კანონმდებლობით გათვალისწინებულ დაავადებათა ჩამონათვალს. შესაბამისად, ბახტურიძეებს შეჩერებული შემწეობა აღარ გაუგრძელდებათ.

[თინათინ ზაზაძე, ადიგენი]