ახალციხეში ავტოსაგზაო შემთხვევის შედეგად 2 მოქალაქე დაშავდა

დაშავებულებს ამ წუთებში კლინიკა „იმედში“ გამოკვლევები უტარდებათ. როგორც კლინიკაში განმარტავენ, ერთ მამაკაცს ყელის არეში აქვს ჭრილობები, მეორეს კი თავის ქალის ტვინის ტრამვა აქვს მიღებული.

„ერთ მათგანს აქვს თავის ქალის ტვინის ტრამვა, ასევე, ჭრილობა მარცხენა შუბლისა და ქუთუთოს არეში. დაჟეჟილი ჭრილობაა. ამ წუთებში უტარდება რენდგენოლოგიური კვლევა და საორიენტაციოდ კომპიუტერული კვლევა იქნება ჩასატრებელი. ზოგადი მდგომარეობა დამაკმაყოფილებელია, საჭიროებს ნერვოპათოლოგისა და ნეიროქირურგის კონსულტაციას. ამის შემდეგ განისაზღვრება შემდეგი მკურნალობის ტაქტიკა“, – გვიხსნის კლინიკა "იმედის" ქირურგი კობა გრიგალაშვილი.

კლინიკაში გვიხსნიან, რომ ასევე გამოკვლევები უტარდება ამ წუთებში მეორე დაზარალებულს, რომელსაც აქვს ჭრილობები ყელის არეში.

ავტოსაგზაო შემთხვევა ახალციხის ხელოვნური ტბის მიმდებარე ტერიტორიაზე, ახალქალაქის გზატკეცილზე, კლინიკა იმედის შესახვევთან, დაახლოებით 14:25 საათზე მოხდა. ერთმანეთს საპირისპიროდ მოძრავი "ვილისი" და "ნისან ექსტერა" შეეჯახნენ. შემთხვევის შედეგად "ვილისში" მსხდომი მამაკაცები დაზარალდნენ.

ადგილზე მობილიზებულია საპატრულო პოლიცია.

საქართველოს შინაგან საქმეთა სამინისტროს პრესსამსახურის ეკატერინე ათოშვილის განმარტებით, შემთხვევას საპატრულო პოლიციის დეპარტამენტის სამცხე–ჯავახეთის მთავარი სამმართველოს საგამოძიებო განყოფილება, საქართველოს სისხლის სამართლის კოდექსის 276–ე მუხლის 1–ლი ნაწილით იძიებს.





[sknews.ge]