ხმაური გადასატანი ყუთების ირგვლივ

"დილიდან წამოვიდა ზარები. ყველა უბანზე სცადეს "ნაციონალებმა" აპრობირებული მეთოდის გამოყენება. მათ მიიღეს წილისყრაში მონაწილეობა და მოხვდნენ იმ წევრებს შორის, ვინც უნდა გაყვეს გადასატან ყუთს, თუმცა, შემდეგ გაყოლაზე უარი განაცხადეს. ცხადია, უნდა შერჩეულიყო სხვა წევრი, ბურჯანაძეს კომისიაში წევრი არ ყავს და ავტომატურად, გამოდიოდა "ოცნების" ორი წევრი. ამან ყველა უბანზე დილიდანვე ხმაური გამოიწვია", - აცხადებს თამარ სამსონიძე.

"ერთიანი ნაციონალური მოძრაობის" შტაბში აცხადებენ, რომ მსგავს ფაქტს ადგილი არ ჰქონია.

"ჩვენი წარმომადგენელი ნამდვილად მონაწილეობდა წილისყრაში და ამ დრომდე რომელი უბნებიდანაც გავიდა გადასატანი ყუთი, ყველას გაყვნენ", - აცხადებს "ერთიანი ნაციონალური მოძრაობის" საარჩევნო შტაბის ხელმძღვანელი მალხაზ გიქოშვილი.

#37 ახალციხის საოლქო კომისიაში ამბობენ, რომ მსგავსი შემთხვევები იყო, თუმცა, ეს არ არის კანონდარღვევა. კერძოდ, გადასატან ყუთს ნამდვილად უნდა გაყოლოდნენ "ოცნებისა და ნაციონალების" წარმომადგენლები, მაგრამ, ვინაიდან "ნაციონალებს" კომისიაში ერთი წევრი ჰყავთ, მას უბნის დატოვება არ სურდა და ჰქონდა უფლება უარი ეთქვა გაყოლაზე.

"ეს არ არის დარღვევა, მათ ჰქონდათ არჩევანის უფლება, ზოგ უბანზე გაყვა, ზოგ უბანზე არ გაყვა. ამ ხმაურს არც მასობრივი ხასიათი ჰქონია", - აცხადებს #37 ახალციხის საოლქო კომისიის მდივანი ქეთევან მიშველიძე.

მისივე განმარტებით, იქ სადაც "ნაციონალმა" უარი განაცხადა ყუთის გაყოლაზე, იგი უბანზე მყოფმა საოლქო კომისიისგან დანიშნულმა წევრმა ჩაანაცვლა: "ოცნების"ორი წევრი არსად არ გაჰყოლია".

[sknews.ge]