N32–ე საარჩევნო უბანზე 2 შენიშვნა დაიწერა

ერთი შენიშვნა უბანზე „ნინო ბურჯანაძე – ერთიანი ოპოზიციის“ წარმომადგენელს, შტაბის უფროსს ჯიმშერ გოგოლაურს ეხება. საარჩევნო კომისიის წევრები მას ზეწოლაში ადანაშაულებენ.

საუბნო საარჩევნო კომისიის თავმჯდომარის ვეფხია დიაკონაშვილის განმარტებით, ჯიმშერ გოგოლაური რომელმაც “სახალხო მოძრაობა – ცესკოს” აკრედიტაცია წარადგინა უბანზე, კომისიის წევრებს დაემუქრა, რომ თუ ოქმს არასწორად შეავსებდნენ, მათ ორი წლით თავისუფლების აღკვეთა ელოდებოდათ.

„უბანზე შემოვიდა “სახალხო მოძრაობის“ წარმომადგენელი ცესკოში ჯიმშერ გოგოლაური, რომელმაც კომისიის წევრებს მუქარის ტონით განუცხადა, რომ ოქმის არასწორად შევსების შემთხვევაში დაისჯებოდნენ 2 წლით თავისუფლების აღკვეთით“, – ვკითხულობთ ჩანაწერთა წიგნში.

ვეფხია დიაკონაშვილი ამბობს, რომ მან გოგოლაურს მიუთითა დაეტოვებინა უბანი და მომხდარი დააფიქსირა ჩანაწერთა წიგნში.

„ნინო ბურჯანაძე – ერთიანი ოპოზიციის“ წევრი ია ხარაიშვილი ამბობს, რომ მსგავს ფაქტს ადგილი არ ჰქონია. ხარაიშვილი, რომელიც საარჩევნო ბლოკის წარმომადგენელია საოლქო კომისიაში, ამბობს, რომ დამკვირვებელს საარჩევნო ყუთი ახლოს ედგა და მან შენიშვნა მისცა, რასაც კომისიის წევრების გაღიზიანება მოჰყვა და ყველაფერი აქედან დაიწყო: "ამაზე ატყდა ერთი ამბავი და დაგვადანაშაულეს ზეწოლაში".

რაც შეეხება მეორე შენიშვნას, ეს შენიშვნა საქართველოს ახალგაზრდა იურისტთა ასოციაციის წარმომადგენელმა დაწერა. შენიშვნა უბანზე მარკირებიან ამომრჩეველს ეხება.

„უბანზე შემოვიდა 1953 წელს დაბადებული რუბენ ხაჩატურიანი. ნაკადის მომწესრიგებელმა დააფიქსირა, რომ მას ხელზე ჰქონდა მარკირება. ამის შესახებ მან უთხრა უბნის თავმჯდომარეს, თუმცა მათ ვერ მიიღეს გადაწყვეტილება უნდა მიეცა თუ არა ხმა აღნიშნულ ამომრჩეველს. ამის შემდეგ მათ დარეკეს საოლქო კომისიაში და უბანზე მოვიდა საოლქოს წარმომადგენელი კარაპეტ კირაკოსიანი. შედეგად, გადაწყდა, რომ ამომრჩეველს ხმა არ უნდა მიეცა“, – ვკითხულობთ ჩანაწერთა წიგნში.

ამავე უბანთან, ისევე როგორც სხვა უბნებთან, დგას „ქართული ოცნების“ ორი წევრი, რომლებიც აცხადებენ, რომ აღრიცხავენ უბანზე მისულ ამომრჩევლებს. თუმცა, მათაც იგივე ინსტრუქციები აქვთ, რაც მეხუთე უბანზე დაფიქსირდა. კერძოდ, აღნიშნონ მხარდამჭერები და გარკვეულ საათებში ინფორმაცია მიაწოდონ ცენტრს მესიჯით.

ერთ–ერთი მათგანი, გიორგი შუბითიძე აცხადებს, რომ აღრიცხავენ ამომრჩევლებს. თუმცა, მას შემდეგ რაც „სამხრეთის კარიბჭემ“ მათ განუცხადა, რომ ინსტრუქციაში საუბარი მხარდამჭერებზეა და არა ზოგადად ამომრჩევლებზე და საიდან ხვდებიან ვინაა მათი მხარდამჭერი, შუბითიძემ განაცხადა, რომ მხარდამჭერებს ცნობენ, ვინაიდან მათ ჩაატარეს კარდაკარი და ყველა ახსოვთ. არცერთმა მათგანმა „სამხრეთის კარიბჭეს“ ფოტოს გადაღების უფლება არ მისცა.

ამავე უბანთან იმყოფებიან უშიშროების წარმომადგენლებიც.

[sknews.ge]