N15–ე საუბნო საარჩევნო კომისიის თავმჯდომარე ჯიმშერ ტაბეშაძე„ერთიანი ნაციონალური მოძრაობის“ წარმომადგენლები აცხადებენ, რომ სოფელ ანში N15–ე საუბნო საარჩევნო კომისიის თავმჯდომარემ ჯიმშერ ტაბეშაძემ ახალციხის საოლქო კომისიიდან წამოღებული ბიულეტენები სახლში წაიღო.
„უბანზე მარტო ვიყავი, ველოდებოდი ბიულეტენებს როდის მოიტანდა. ამ დროს მისმა მანქანამ ზევით აიარა. ამასობაში პარტიიდანაც მირეკავდნენ და ამოწმებდნენ მოვიდა თუ არა ბიულეტენები ადგილზე. ლოდინში საუბნო კომისიის ეზოს გამოვცდი, როცა დავინახე ჯიმშერის მანქანა უბნისკენ მიდიოდა და მაშინვე მივყევი. ის უკვე უბანზე იყო შესული და სეიფის კარი ჰქონდა გაღებული“, - ამბობს N15–ე საუბნო საარჩევნო კომისიის წევრი „ნაციონალური მოძრაობიდან“ მეგი კაპანაძე.
კითხვაზე დარწმუნებულია თუ არა, რომ ტაბეშაძემ ბიულეტენები ნამდვილად სახლში წაიღო გვპასუხობს: „დარწმუნებული არ ვარ, რომ სახლში ჰქონდა წაღებული. მაგრამ ის, რომ მანქანა პირდაპირ უბანზე არ შემოვიდა, აშკარაა“.
ტაბეშაძე მომხდარს უსაფუძვლო აჟიოტაჟს უწოდებს და ამბობს, რომ ამ ხმების გავრცელება მას აწყობდა, ვინც გამარჯვებაში დარწმუნებული არაა: „ბიულეტენები უბანზე დავტოვე და სახლში წავედი საჭმელად. ამ წუთშიც სეიფში აწყვია ლუქითა და ბეჭდებით. რატომ წავედი სახლში, მაგაზე ატეხეს ამბავი“.
მისი თქმით, მაშინ, როცა უბანზე ბიულეტენები დატოვა, საუბნო კომისიის წარმომადგენლების ნახევარზე მეტი იქ იყო: „2 საათი მოვრიხინებდი გზაზე, რამის გაკეთება რომ მდომებოდა, იქ გავაკეთებდი“.
ტაბეშაძეს ემოწმება N15–ე საუბნო საარჩევნო კომისიის წევრი ჯუმბერ კაპანაძე: „ბიულეტენები რომ მოიტანა, უბანზე ვიყავი, ჩემთან ერთად იყო კიდევ სამი წევრი“.
მათ განცხადებას სიცრუეს უწოდებს მეგი კაპანაძე და ამბობს, რომ უბანზე ბიულეტენებს მარტო ელოდა: „ახლა უნამუსოდ აცხადებენ, რომ ვითომ, როცა თავმჯდომარე მოვიდა, იქ იყვნენ. არადა, მარტო მე ველოდი. ჯუმბერ კაპანაძემ უბანი ერთი საათით ადრე დატოვა“.
კომისიის წევრი „ნაციონალური მოძრაობიდან“ მეგი კაპანაძეახალციხის მერობის კანდიდატი „ნაციონალური მოძრაობიდან“ გელა დემეტრაძე აცხადებს, რომ ტაბეშაძეს ბიულეტენების სახლში წაღება თავიდანვე დაგეგმილი ჰქონდა: „როგორღაც მოახერხა უბნის თავმჯდომარემ და კომისიის 4 წევრს იმოწმებს, რომ თითქოს ბიულეტენების მიტანისას ისინი თან ახლდა. მას ჩვენ წარმომადგენელთან, რომელიც ასაკით ბევრად პატარაა, ხმამაღალი შელაპარაკება მოუვიდა, ამიტომ მეგი ცოტა დაიბნა“.
N37–ე ახალციხის საოლქო საარჩევნო კომისიის წევრი კარაპეტ კირაკოსიანი, რომელმაც ბიულეტენები N15–ე საუბნო საარჩევნო კომისიის სეიფში თავად გადაამოწმა, გავრცელებულ ინფორმაციას იმის შესახებ, რომ თითქოს ბიულეტენები ვიღაცამ სახლში წაიღო, სიცრუეს უწოდებს.
„ჩემი თვალით ვნახე ბიულეტენები, ყველა ადგილზეა, ლუქები დარღვეული არ არის. თავმჯდომარემ ბიულეტენები სეიფში ჩაკეტა და მერე წავიდა სახლში“, - ამბობს კირაკოსიანი.
მიუხედავად იმისა, რომ 650-ვე ბიულეტენი ადგილზეა, დემეტრაძე მომხდარს საოლქო კომისიაში მაინც გაასაჩივრებს.
„ყველამ კარგად იცის როგორი გასაუბრების შემდეგ შეირჩნენ საუბნო კომისიის თავმჯდომარეები. მსგავსი ფაქტები სხვა უბნებზეც დაფიქსირდა, შესაძლოა მმართველ კოალიციას რაიმე მექანიზმი აქვს შემუშავებული“, - აცხადებს დემეტრაძე.
[თამუნა უჩიძე, ახალციხე]