რა ცვლილებები ელის ამომრჩეველს საარჩევნო უბანზე

პირველი და ყველაზე მთავარი, რაც ამომრჩეველმა უნდა იცოდეს, ისაა, რომ მათ სამი ბიულეტენი დახვდებათ და თითოეულ მათგანზე ერთი კანდიდატი უნდა შემოხაზონ.

1.მერობის ან გამგებლობის კანდიდატები;
2.საკრებულოს მაჟორიტარი წევრები;
3.პროპორციული სიიდან, ანუ ამ შემთხვევაში პარტია უნდა აირჩიოს ამომრჩეველმა;

გასული თვითმმართველობის არჩევნებისგან განსხვავებით, საარჩევნო კოდექსში წელს რამდენიმე სიახლეა.

ამომრჩეველთა სამაგიდო ერთიან სიაში, ამომრჩევლების მონაცემებთან ერთად, ფოტოსურათებიც იქნება დამატებული. გარდა ამისა, სიებში მითითებულია სქესი, რომელიც ბოლოს დაითვლება და გაკეთდება სტატისტიკა, რამდენმა მამაკაცმა და ქალბატონმა მიიღო არჩევნებში მონაწილეობა.

საარჩევნო უბნებზე იქნება გამადიდებელი ლინზა და ამომრჩეველს, რომელსაც მხედველობის პრობლემა აქვს, მისი გამოყენება შეეძლება.

ამომრჩეველს კაბინაში მხოლოდ კალამი დახვდება (აღარ გაიკვრება ბიულეტენების შევსების წესი და ინფორმაცია ბიულეტენების ბათილობის შესახებ).

და ბოლოს, ადგილობრივი თვითმმართველობის არჩევნებზე კომისიის წევრებს ბეჭდებზე ნაკვეთურების გაკეთება აღარ მოუწევთ.
საარჩევნო სისტემების განვითარების რეფორმებისა და სწავლების ცენტრის წარმომადგენლის ნათია იოსელიანის განმარტებით, იმ შემთხვევაში, თუ რეგისტრატორი მიიჩნევს, რომ ფოტოსურათი შეუსაბამოა ამომრჩეველთან, ამ უკანასკნელს ხმის მიცემის უფლება მაინც ექნება.

„ამომრჩეველი აუცილებლად მისცემს ხმას, თუმცა ჩანაწერთა წიგნში, მისთვის განკუთვნილ შესაბამის ადგილზე, უნდა გაკეთდეს შეუსაბამობის ფაქტი, უნდა მოინიშნოს ამომრჩევლის სახელი და გვარი და რიგითი ნომერი. ამომრჩევლის წარდგენილ დოკუმენტს უღებენ ფოტო ასლს, ამის შემდეგ აწერს მდივანი ხელს და ინახავენ ჩანაწერთა წიგნთან ერთად. ბოლოს ილუქება და იგზავნება ოლქში“, - ამბობს იგი და ამატებს, რომ რაც შეეხება ბეჭდებთან დაკავშირებულ ცვლილებას, ნაკვეთურის გაკეთება იყო მხოლოდ ტექნიკური დეტალი და რეალურად, შედეგზე გავლენას არ ახდენდა.

„იყო შემთხვევები, როცა კომისიის წევრს ავიწყდებოდა მეორე ნაკვეთურის გაკეთება და ვიღებდით შემაჯამებელ ოქმში ერთნაკვეთურიან ბეჭდებს. ეს რეალურად შედეგზე გავლენას ვერ ახდენდა და რადგან რეალურად არ ცვლიდა სურათს, ამოიღეს“, - ამბობს იგი.

[თინათინ ზაზაძე, ახალციხე]