ახალციხელი ახალგაზრდები ანაკლიის ბანაკში დაისვენებენ

18-დან 20 წლამდე ასაკის ახალგაზრდები პატრიოტთა ბანაკში ერთი კვირის განმავლობაში დაისვენებენ. ბანაკში ახალციხიდან უკვე მესამე ჯგუფი წავიდა.

ახალციხის მუნიციპალიტეტის გამგეობის კულუტურის, ძეგლთა დაცვისა და ახალგაზრდობის საქმეთა სამსახურის უფროსის იური ზარიძის განმარტებით, გასული წლისგან განსხვავებით წელს პატრიოტულ ბანაკში დასვენება ყველა ახალგაზრდას შეუძლია.

”პროექტში მონაწილეობა შეუძლია ყველას, ვინც განცხადებას შემოიტანს. შემდეგ წილისყრით ვარჩევთ მონაწილეებს. წინა ნაკადზე 45 განცხადება იყო, ამჯერად, რადგან საგამოცდო პერიოდი იყო, მხოლოდ 15 განაცხადი შემოვიდა”, - ამბობს იური ზარიძე.

ახალციხის მუნიციპალიტეტიდან ბანაკში პირველი ნაკადი 1 ივნისს გაემგზავრა. შემდეგი 20 აგვისტოს გავა.

ანაკლიის პატრიოტთა ბანაკი 1 ივნისს, საზეიმოდ გაიხსნა. პროგრამა 7 ოქტომბერს დასრულდება. კონფლიქტის ზონასთან მდებარე ბანაკში ჯამში 6 000 ახალგაზრდა დაისვენებს.

აღნიშნული პროექტი პრეზიდენტის ინიციატივაა, რომელსაც სპორტისა და ახალგაზრდობის საქმეთა სამინისტრო ახორციელებს. გასულ წლებთან შედარებით, დღეების რაოდენობა შემცირებულია. მოზარდები შავიზღვისპირეთში ათის ნაცვლად 7 დღის განმავლობაში რჩებიან.

[ნინო ნარიმანიშვილი, ახალციხე]