დღეს ახალციხიდან ჯარში 18 ახალგაზრდა წავიდა

ახალგაზრდები ოჯახის წევრებმა და ახლობლებმა სავალდებულო სამსახურში დღეს დილით გააცილეს.

ახალციხის მუნიციპალიტეტის გამგეობის სამხედრო აღრიცხვისა და გაწვევის სამსახურის უფროსის გია კაპანაძის თქმით, 2014 წლის 7 თებერვლის განკარგულების საფუძველზე საგაზაფხულო გაწვევა დაიწყო. შინაგან საქმეთა სამინისტროს დაქვემდებარებაში მყოფ შენაერთებში ახალციხის მუნიციპალიტეტიდან პირველ ეტაპზე 18 ახალგაზრდა გაემგზავრა, თებერვლის ბოლოს კი დაახლოებით 20-მდე წვევამდელი გაემგზავრება. საგაზაფხულო გაწვევა მიმდინარე წლის ივლისის ბოლოს დასრულდება.

სავალდებულო სამსახურში 18-დან 27 წლამდე ახალგაზრდებს იწვევენ. შეღვათები და გადავადება ეკუთვნით სტუდენტებს, ცოლშვილიანებსა და მათ, ვისაც ჯამნმრთელობის მდგომარეობა არ უწყობთ ხელს.

წვევამდელებს სურვილისამებრ შეუძლიათ საკონტრაქტო სამსახურზე წასვლა. წვევამდელები სამხედრო სამსახურში ერთი წლისა და 3 თვის განმავლობაში რჩებიან.

[თამარ თოთაძე, ახალციხე]