ახალციხის მერობის კანდიდატები არჩევნების დღეს აფასებენ

საარჩევნო ბლოკის „ბაქრაძე უგულავა– ევროპული საქართველოს“ კანდიდატის ვაჟა ჩიტაშვილის განმარტებით, მნიშვნელოვანი დარღვევები კენჭისყრის დღეს არ დაფიქსირებულა: „ ნაოხრების უბანზე იყო პატარა ინციდენტი. ისეთი დარღვევები კონკრეტულად დღეს არ დაფიქსირებულა. დანარჩენი ხმის დათვლის დროს გაირკევევა. საარჩევნო პროცესი დღეს არ დაწყებულა“.

მისი თქმით, ამომრჩევლების აქტივობაც ნორმალური იყო, რადგან 2014 წლის ადგილობრივი თვითმმართველობის არჩევნებთან შედარებით, დღეს, 2017 წლის 21 ოქტომბერს მეტი ამომრჩეველი მივიდა.

ვაჟა ჩიტაშვილისგან განსხვავებით გაყალბებასა და ზეწოლაზე საუბრობს საარჩევნო ბლოკი „ერთიანი ნაციონალური მოძრაობის“ მერობის კანდიდატი ირაკლი ბარძიმაძე: „ჩვენ ვიდეო და აუდიო ჩანაწერებიც გვაქვს და ოქმიც დავწერეთ, ეს იყო გაყალბებული არჩევნები, სომხურ ზონაში, საძელის უბანზე, თავმჯდომარესა და „ოცნების“ წარმომადგენელს შეჰყავდათ კაბინაში ამომრჩევლები შემოსახაზად“.

მისი თქმით, დაშინებისა და ზეწოლის გამო, დღეს საარჩევნო უბნებზე ხმის მისაცემად ამომრჩევლების მცირე ნაწილი მივიდა.
დარღვევებზე საუბრობს „დავით თარხან მოურავი, ირმა ინაშვილი – საქართველოს პატრიოტთა ალიანსის“ კანდიდატი ჯუმბერ ინასარიძეც: „ამბები ატყდა ნაოხრებში. მე რომ მკითხონ, სულ უნდა გააუქმონ მაგ უბნის შედეგები. რაც შეეხება ამომრჩეველთა რაოდენობას, ნორმალური იყო“.

ვინ შეიძლება გაიმარჯვოს არჩევნებში, პროგნოზის გაკეთება უჭირს „თავისუფლება – ზვიად გამსახურდიას გზის“ კანდიდატს ჯიმშერ გოგოლაურს. იგი ფიქრობს, რომ მმართველი გუნდის დღევანელი ქმედება შედეგზე მათ სასარგებლოდ აისახა: „ჯგუფები ჩამოაყალიბეს, რომლებიც ყველა უბანზე იდგნენ და ინიშნავდნენ მომსვლელებს. რაც საქართველოს მასშტაბით ხდებოდა, ანალოგიური მდგომარეობა იყო აქაც, თანაბარ ვითარებაში არ ვიყავით“.

დემოკრატიულად აფასებს დღევანდელ არჩევნებს „ქართული ოცნება– დემოკრატიული საქართველოს“ მერობის კანდიდატი ზაზა მელიქიძე: „საარჩევნო პროცესმა ჩაიარა დემოკრატიულად, როგორც ველოდებოდით. არაფერი განსაკუთრებული არ ყოფილა, ყველა ამომრჩეველს მიეცა საშუალება თავისი შეხედულებისამებრ დაეფიქსირებინა არჩევანი. მე ვმოძრაობდი უბნებზე და ზეწოლების შესახებ არ გვსმენია. ველოდებით შედეგებს“.

[sknews.ge]