ხუთივე კანდიდატი მამაკაცია:
ბახვა გელაშვილი – ბლოკ „არასაპარლამენტო ოპოზიციიდან“ (კახა კუკავა, ფიქრია ჩიხრაძე);
ოლეგი ძოწენიძე – „ნინო ბურჯანაძე, ერთიანი ოპოზიციიდან“;
გოჩა გვარამაძე – ბლოკ „ერთიანი ნაციონალური მოძრაობიდან“;
მამუკა გოგოლაძე – „დავით თარხან მოურავი – საქართველოს პატრიოტთა ალიანსიდან“ და
ზაზა მელიქიძე – ბლოკ „ქართული ოცნებიდან“.
ბახვა გელაშვილი 1967 წლის 27 თებერვალს, ახალციხის მუნიციპალიტეტის სოფელ ჭვინთაში დაიბადა. 1982 წელს ამავე სოფლის 8 კლასი დაამთავრა. რის შემდეგაც სწავლა ახალციხის სანერგე საბჭოთა მეურნეობის ტექნიკუმში გააგრძელა. აღნიშნული სასწავლებელი 1986 წელს დაამთავრა. 1988 წელს მუშაობა დაიწყო ახალციხის სატყეო მეურნეობაში, 1992 წელს კი სოფელი ჭვინთის საბჭოთა მეურნეობაში მუშაობდა. საბჭოთა მეურნეობების გაუქმების შემდეგ, მძღოლად მუშაობს. ჰყავს მეუღლე და სამი შვილი.
ოლეგი ძოწენიძე 1975 წლის 16 აგვისტოს, ახალციხეში დაიბადა. დაამთავრა ახალციხის მეხუთე საშუალო სკოლა. 1989–1992 წლებში ახალციხის სასოფლო სამეურნეო ტექნიკუმში საბუღალტრო ფაკულტეტზე სწავლობდა. პარალელურად, ჩააბარა გორის სახელმწიფო ინსტიტუტში, ეკონომიკის ფაკულტეტზე, რომელიც 1995 წელს დაამთავრა. ამავე წელს მუშაობა დაიწყო ახალციხეში, საგადასახადო ინსპექციაში. აღნიშნულ სამსახურში, 18 წლის განმავლობაში, სხვადასხვა თანამდებობებზე მუშაობდა, ბოლოს, 2013 წლის სექტემბრამდე სამცხე–ჯავახეთის სექტორის უფროსი იყო. საჯარო სამსახურიდან კერძო სექტორში გადაინაცვლა. ამჟამად შპს "პროგრესში" ფინანსურ მენეჯერად მუშაობს. ასევე დაფუძნებული აქვს არასამთავრობო ორგანიზაცია "ახალგაზრდობა ჯავახეთის განვითარებისათვის", სადაც ასევე ფინანსური მენეჯერია. ჰყავს მეუღლე და სამი შვილი.
გოჩა გვარამაძე1963 წლის 12 იანვარს, ახალციხეში დაიბადა. საჯარო სკოლის დასრულების შემდეგ, თბილისის ივანე ჯავახიშვილის სახელობის სახელმწიფო უნივერსიტეტში, გეოლოგიის ფაკულტეტზე ჩაირიცხა. მუშაობდა ახალციხის სანერგე მეურნეობაში, შემდეგ კოოპერატივ "არწივის თვალის" თავმჯდომარე იყო. 1991–1992 წლებში ახალციხის რაიონის პრეფექტურაში მუშაობდა, 1993–1996 წლებში ჯერ ახალციხის რაიონის გამგეობის თავმჯდომარის მოადგილე, შემდეგ კი პირველი მოადგილე იყო. 1996-1999 წლებში ახალციხის საკონსერვო ქარხნის დირექტორის პოსტზე მუშაობდა, შემდეგ კი საქართველოს პარლამენტის წევრი და ეროვნებათშორისი კომიტეტის თავმჯდომარე იყო. 2009 წელს საგანგებო დავალებათა ელჩი, 2009–2013 წლებში კი სომხეთის რესპუბლიკაში საქართველოს საელჩოს საგანგებო და სრულუფლებიანი დესპანი იყო. ჰყავს მეუღლე და ორი შვილი.
მამუკა გოგოლაძე1966 წლის 25 ოქტომბერს, ქალაქ ვალეში დაიბადა. დაამთავრა ვალის პირველი საჯარო სკოლა. 1987–1992 წლებში თბილისის ტექნიკურ უნივერსიტეტში ჰიდროტექნიკის–სანტექნიკის ფაკულტეტზე სწავლობდა, ინჟინერ–მშენებელის კვალიფიკაციით. ინსტიტუტის დამთავრების შემდეგ კომპანია "ვალეს" პრეზიდენტი გახდა, რომელიც სურსათით და ავეჯით ვაჭრობდა. მოგვიანებით სხვადასხვა წლებში, რუსეთში, მშენებლობაზე იყო დაკავებული. 2007–2008 წლებში ხორცის პროდუქტების კომპანიის, შპს "აპისის" გენერალური დირექტორი იყო. (2008 წლიდან კომპანიამ მუშაობა შეწყვიტა).
ზაზა მელიქიძე1966 წლის 6 მაისს, ასპინძის რაიონის სოფელ ტოლოშში დაიბადა. დაამთავრა ამავე სოფლის საჯარო სკოლა, რის შემდეგაც სასოფლო–სამეურნეო ინსტიტუტში, საბუღალტრო–ეკონომიკურ ფაკულტეტზე ჩააბარა. მუშაობდა სარემონტო სახელოსნოში ავტოშემკეთებლად, შემდეგ ახალციხის ადგილმრეწველობის სარაიონთაშორისო საწარმოო გაერთიანების მომარაგება–გასაღების უფროსად. მოგვიანებით კი ამავე გაერთიანების ლუდის საამქროს თავმჯდომარე იყო. ასევე იყო შპს „მესხეთი XXI“ –ის დირექტორი. 2010 წლიდან კი შპს „მელიზას“ ხელმძღვანელია. ჰყავს მეუღლე და ორი შვილი.
[sknews.ge]