ახალციხეში დამოუკიდებლობის დღეს აღნიშნავენ

ამ წუთებში ახალციხის ქვედა ციხის ამფითეატრში ადგილობრივი ქორეოგრაფიული და ფოლკლორული ანსამბლების კონცერტი მიმდინარეობს.

პარალელურად, ციხის ტერიტორიაზე მიმდინარეობს შეჯიბრი მძლეოსნობაში, რომელშიც რეგიონის სხვადასხვა მუნიციპალიტეტების სპორტსმენები მონაწილეობენ.

უკვე გაიხსნა გამოფენებიც. ქვედა ციხეში შეგიძლიათ დაათვალიეროთ ხალხური რეწვის ნიმუშების, ადგილობრივი მხატვრების ნამუშევრებისა და შეზღუდული შესაძლებლობების მქონე პირთა ხელნაკეთი ნივთების გამოფენები.



გახსნილია ღვინის ფესტივალი და წიგნების გამოფენა–გაყიდვა.

აქვე არიან სამხატვრო სკოლის მოსწავლეები, რომლებიც მსურველებს სხვადასხვა ფიგურებით ალამაზებენ.

ციხის ტერიტორიაზე იმყოფებიან სამცხე–ჯავახეთის სამხარეო ადმინისტრაციისა და ახალციხის მუნიციპალიტეტის გამგეობის წარმომადგენლები, ახალციხისა და ტაო–კლარჯეთის მიტროპოლიტი თეოდორე,„ქართული ოცნების“ მერობისა და გამგებლობის კანდიდატები, ასევე სხვადასხვა მუნიციპალიტეტებიდან ჩამოსული მოსახლეობა.



[თამარ თოთაძე, თინათინ ზაზაძე, ახალციხე]