ავტოავარიით დაზარალებულ გოგონას გამოკვლევები უტარდება

„უნიმედი სამცხეს“ მფლობელი კომპანია „ჩემი ოჯახის კლინიკის“ საზოგადოებასთან ურთიერთობის სამსახურში აცხადებენ, რომ დაშავებულ 17 წლის მ.დ-ს ამ წუთებში გამოკვლევები უტარდება.

„მის სიცოცხლეს საფრთხე არ ემუქრება. მეტს ვერაფერს გეტყვით“, - ამბობს საზოგადოებასთან ურთიერთობის სამსახურის წარმომადგენელი თეო ლალიაშვილი.

შეგახსენებთ, რომ ავტოსაგზაო შემთხვევა ქალაქ ვალეში, სტალინის ქუჩაზე, მეორე საჯარო სკოლასთან, დღეს, დაახლოებით 12:50 საათზე მოხდა. თვითმხილველების თქმით, მოსწავლე მ.დ სკოლიდან სახლში ბრუნდებოდა, რა დროსაც მას მსუბუქი ავტომანქანა დაეჯახა.

„გამოცდა ჩავაბარეთ, სახლში მიდიოდა, რვეული უნდა დაეტოვებინა. გზაზე ერთად გადმოვდიოდით, მე დავინახე მანქანა, მაგრამ გაფრთხილება ვეღარ მოვასწარი. დაჯახების შემდეგ „კაპოტზე“ შეაგდო და ორჯერ დაატრიალა, შემდეგ ძირს გადმოვარდა“, - ამბობს დაზარალებულის კლასელი ნორაირ ავაკიანი.

მისივე თქმით, გოგონამ რამდენიმე წუთით გონება დაკარგა, თუმცა გონს მალევე მოვიდა: “სახეზე ჰქონდა დაზიანება და ფეხზე“.

ავტომანქანის მძღოლი, რომელიც ასევე ვალეს მკვიდრია, ამბობს, რომ სწრაფად არ მოძრაობდა, მაგრამ გოგონა უცბად გადავიდა გზაზე და დამუხრუჭება ვეღარ შეძლო.

საქართველოს შინაგან საქმეთა სამინისტროს ინფორმაციით, ავტოსაგზაო შემთხვევას საპარტულო პოლიციის დეპარტამენტის სამცხე-ჯავახეთის მთავარი სამმართველო სსკ–ის 276 - ე მუხლით იძიებს.

[თინათინ ზაზაძე, ახალციხე]