ვალეს საავადმყოფოს შენობა იყიდება

შენობაში ამჟამად მხოლოდ სასწრაფო სამედიცინო დახმარების ერთი ბრიგადა და უბნის სამი ექიმი და ამდენივე ექთანი მუშაობს. ყველა მათგანი ახალციხის რაიონული საავადმყოფოს დაქვემდებარებაშია.

გასული წლის 1 ოქტომბრიდან, მას შემდეგ, რაც მუნიციპალიტეტის სამედიცინო დაწესებულებების ცენტრალიზაცია მოხდა, ახალციხის რაიონული პოლიკლინიკა, ახალციხის რაიონის ვალის საავადმყოფო, ახალციხის სარაიონთაშორისო ფსიქონევროლოგიური დისპანსერი, ახალციხის რეგიონული ნარკოლოგიური ცენტრი, ახალციხის სასწრაფო-სამედიცინო დახმარების სამსახური 03, ახალციხის კანისა და ვენსნეულებათა დისპანსერი და ქალთა კონსულტაცია ფუნქციონირებას ერთ მისამართზე - რუსთაველის #105 ა, ახალციხის რაიონული საავადმყოფოს შენობაში აგრძელებს.

ის, რომ სასწრაფო დახმარების სამსახურის ერთი ბრიგადა ცენტრალიზაციის შემდეგ ტერიტორიულად მაინც ვალეში დარჩა, რამდენიმე ფაქტორმა განაპირობა. ექიმების თქმით, გარდა იმისა, რომ ვალე ქალაქის ტიპის, საკმაოდ დიდი დასახლებაა, ისინი დამატებით 12 სოფელსაც ემსახურებიან და გარდა ამისა, ვალე პირველი დასახლებული პუნქტია, რომელიც ყველაზე ახლოსაა თურქეთის საზღვართან. ამდენად, აქ ერთი ბრიგადის არსებობა აუცილებელი იყო.

იმის შესახებ, რომ შენობის დატოვება მოუწევთ, თანამშრომლებმა იციან, თუმცა როდის უნდა დაცალონ შენობა,ან სად გააგრძელებენ მუშაობას, ვერ აკონკრეტებენ.

- ”ამბობენ, ეს შენობა აუქციონზე უნდა გაიყიდოსო, მაგრამ დაზუსტებით ვერაფერს გეტყვით. ჩვენს გარდა ამ შენობაში უბნის ექიმებიც არიან. სავარაუდოდ, ყოფილი პოლიციის შენობაში გამოინახა თავისუფალი ოთახები და იქ გადაგვიყვანენ. არის საუბარი სახანძროს შენობაზეც. სად და როგორ მოხდება ჩვენი სამსახურის გადასვლა, ვერ გეტყვით“, -ამბობს სასწრაფოს მედდა მარინა კაკაჩიშვილი.

ოჯახის ექიმის მერი ხაბეიშვილის თქმით, ამჟამად შენობაში სალიკვიდაციო პროცესები მიმდინარეობს.

- ”დაახლოებით ორ კვირაში გამოცხადდება ტენდერი და შემდეგ გაიყიდება შენობა. შეგვეძლო თანამშრომლებს გვეყიდა, მაგრამ ამის მატერიალური საშუალება არ გვაქვს. ამიტომ რწმუნებულის დახმარებით ყოფილი პოლიციის შენობაში ალტერნატიული ფართი მოვიძიეთ”, - ამბობს ხაბეიშვილი და ამტებს, რომ საბოლოო ჯამში ექიმები მაინც დაზარალებულნი გამოდიან, - ”თითო ექიმს პრეზიდენტის საჩუქარი 2000 ლარი გადმოგვეცა. ამ თანხის ფარგლებში კაბინეტები გავარემონტეთ. დარჩენილი თანხა მეზობელ ოთახებსაც დავახმარეთ. ახლა რომ გამოვიდეთ როგორც დამოუკიდებელი პირები, გამოდის რომ ოთახები ჩვენ უნდა გავარემონტოთ, რისი საშუალებაც არ გვაქვს. ამიტომ, მივმართეთ რწმუნებულს, რომ ფართი გამოეყო. სასურველი იქნება სასწრაფოც და უბნის ექიმებიც ისევ ერთ შენობაში ვიყოთ“.

ვალეს ყოფილი საავადმყოფოს გაყიდვის თაობაზე, ვალეს ტერიტორიული გაერთიანების რწმუნებუმა გელა გოზალიშვილმა, ორშაბათს, ახალციხის მუნიციპალიტეტის გამგეობის თათბირზე განაცხადა.

მისი თქმით, ყოფილი საავადმყოფოს შენობა გასაყიდ ობიექტთა ნუსხაშია, ამიტომ ის, რომ ექიმებს შენობის დატოვება მოუწევთ, რეალურია: ”მართალია ჯერჯერობით არ იყიდება და არც მყიდველია, მაგრამ თადარიგს წინასწარ ვიჭერთ. გამოვძებნეთ ალტერნატიული ფართი შესაბამისი კომუნალური პირობებით.

ქალაქის ცენტრში, სტალინის #7-ში, ყოფილი პოლიციის შენობაში არის ადგილი, სადაც ორივე ბრიგადა: უბნის ექიმებიც და სასწრაფოს ექიმებიც შეიძლება შევიყვანოთ”.

სასწრაფო დახმარების ბრიგადისა და უბნის ექიმების გარდა ყოფილი პოლიციის შენობაში უნდა განთავსდეს რწმუნებულის აპარატიც.

გელა გოზალიშვილის თქმით, ის შენობა, სადაც ამჟამად იმყოფებიან, ავარიულია: ”შენობა ძალიან ძველი და ამორტიზებულია, წყალი ჩამოდის, გარემონტებისთვის თანხების გაღებას აზრი არ აქვს. ამოტომ ყოფილი პოლიციის შენობაში გადასვლა ჩვენც მოგვიწევს”.

ყოფილი პოლიციის შენობა ორსართულიანია. პირველი სართული კერძო პირებს ეკუთვნით და სავაჭრო ობიექტებია გახსნილი. მეორე სართული ჯერჯერობით ცარიელია.

გოზალიშვილის თქმით, თუ აღმოჩნდება, რომ ფართი საკმარისი არ არის, არსებობს კიდევ ერთი ალტერნატივა, კულტურის სახლი. თუმცა, ტერიტორიულად პოლიციის შენობა უფრო სტრატეგიულ ადგილას, ქალაქის ცენტრშია. მასზე აქცენტიც ამიტომ კეთდება.

კონკრეტულად როდის მოუწევს შენობის დაცლა მედპერსონალს, შპს ქალთა კონსულტაციისა და კანისა და ვენ-სნეულებათა დისპანსერის დირექტორი მარინა მანველიშვილი ვერ აკონკრეტებს.

- ”ჯერ აუდიტური დასკვნები კეთდება. საწარმოთა მართვის სააგენტოდან კონკრეტულ დავალებებს როცა მივიღებ, მაშინ გაგცემთ პასუხს. ჯერ სამუშაო დასრულებული არ არის”, - აცხადებს იგი.

აღნიშნულ საკითხთან დაკავშირებით ინფორმაცია ჯერჯერობით არც ქონების მართვის სამხარეო სამმართველოს აქვს.

[თინათინ ზაზაძე, ახალციხე]