ვალეს საავადმყოფოს შენობა იყიდება

შენობაში ამჟამად მხოლოდ სასწრაფო სამედიცინო დახმარების ერთი ბრიგადა და უბნის სამი ექიმი და ამდენივე ექთანი მუშაობს. ყველა მათგანი ახალციხის რაიონული საავადმყოფოს დაქვემდებარებაშია.

იმის შესახებ, რომ შენობის დატოვება მოუწევთ, თანამშრომლებმა იციან, თუმცა როდის უნდა დაცალონ შენობა, ან სად გააგრძელებენ მუშაობას, ვერ აკონკრეტებენ.

- ”ამბობენ, ეს შენობა აუქციონზე უნდა გაიყიდოსო, მაგრამ დაზუსტებით ვერაფერს გეტყვით. ჩვენს გარდა ამ შენობაში უბნის ექიმებიც არიან. სავარაუდოდ, ყოფილი პოლიციის შენობაში გამოინახა თავისუფალი ოთახები და იქ გადაგვიყვანენ. არის საუბარი სახანძროს შენობაზეც. სად და როგორ მოხდება ჩვენი სამსახურის გადასვლა, ვერ გეტყვით“, -ამბობს სასწრაფოს მედდა მარინა კაკაჩიშვილი.

ვალეს ყოფილი საავადმყოფოს გაყიდვის თაობაზე, ვალეს ტერიტორიული გაერთიანების რწმუნებუმა გელა გოზალიშვილმა, ორშაბათს, ახალციხის მუნიციპალიტეტის გამგეობის თათბირზე განაცხადა.

რატომ იყიდება ყოფილი საავადმყოფოს შენობა და რა ბედი ეწევა იქ მომუშავე მედ-პერსონალს, ”სამხრეთის კარიბჭე” დეტალურ ინფორმაციას მოგვიანებით შემოგთავაზებთ.

[თინათინ ზაზაძე, ვალე]