მერიის შენობა ინვესტორს ელოდება

ყოფილი მერიის შენობაში ამჟამად ათამდე საჯარო და კერძო სამსახური ფუნქციონირებს. მათ შორის, საჯარო და სამოქალაქო რეესტრი, აღმასრულებელი ბიურო, პრობაციის სამსახური, ახალციხის საგანმანათლებლო რესურსცენტრი და სოციალური მომსახურების სააგენტოს რაიონული და რეგიონული სამსახურები.

მას შემდეგ, რაც იუსტიციის სახლი გაიხსნება, იუსტიციის სამინისტროს დაქვემდებარებაში მყოფი სამსახურები, საჯარო და სამოქალაქო რეესტრი, აღმასრულებელი ბიურო და პრობაციის სამსახური, იუსტიციის სახლში გადაინაცვლებს.

სად დაიდებს ბინას საგანმანათლებლო რესურსცენტრი და სოციალური მომსახურების სამსახურები, ჯერჯერობით უცნობია.

ახალციხის მუნიციპალიტეტის გამგებლის გელა დემეტრაძის თქმით, თუ შენობით ინვესტორი დაინტერესდა, ფართი ამ საჯარო სამსახურებისთვისაც გამოინახება. სავარაუდოდ, მათზე შესაბამისი სამინისტროები იზრუნებენ.

რაც შეეხება კერძო სტრუქტურებს, გამგებლის თქმით, მათ ფართის მოძიებაზე თავად უნდა იზრუნონ.

“რაიმე ვადები ჯერ არ მიგვიცია, მათ აქვთ იმის დრო, რომ ფართები მოიძიონ”, - ამბობს გამგებელი.

მისივე თქმით, ამ ეტაპზე არც ისაა გარკვეული, რა ბედი ეწევა ყოფილი მერიის ექვსსართულიან შენობას.

[მანანა სარაშვილი, ახალციხე]