უატესტატოდ დარჩენილი მოსწავლეები სწავლას არ აგრძელებენ

ახალციხის მესამე სომხურენოვანი საჯარო სკოლიდან ერთიან ეროვნულ გამოცდებს მხოლოდ 12 მოსწავლე აბარებს. ამათგან, ორი სწავლას ერევანში გააგრძელებს.

ახალციხის მესამე საჯარო სკოლაში საატესტატო გამოცდებს წელს 68 მოსწავლე აბარებდა. აქედან, 16 შარშანდელი კურსდამთავრებულია, ვინც ატესტატის გარეშე დარჩა, 9- ექსტერნი, 2 კი სოფელ საძელის სკოლის მეთორმეტეკლასელი.

გამოცდაზე გამსვლელთა თითქმის ნახევარი წელს უატესტატოდ დარჩა. საშუალო განათლების დამადასტურებელი ატესტატი 68 მოსწავლიდან მხოლოდ 35-მა აიღო. დანარჩენებს გადაეცემათ სერტიფიკატები, რომლებიც მათ საშუალებას აძლევს სწავლა კოლეჯში ან საქართველოს ფარგლებს გარეთ გააგრძელონ.

მესამე საჯარო სკოლის დირექტორი სვეტა არუთუნიანი ამბობს, რომ ამ შესაძლებლობის შესახებ მოსწავლეებმა იციან, მაგრამ საქართველოს ფარგლებს გარეთ სწავლის გაგრძელებას არავინ აპირებს.

- ”ჯერ სერტიფიკატები არ ჩამოსულა, მაგრამ ვიცი, რომ არცერთი მოსწავლე, ვინც ატესტატი ვერ აიღო, საქართველოს გარეთ სწავლის გაგრძელებას არ აპირებს”, - ამბობს სვეტა არუთუნიანი.

გამოცდების ასეთ შედეგებს სკოლის დირექტორი რამდენიმე ფაქტორს უკავშირებს.

მისი თქმით, განსაკუთრებით ცუდი შედეგი მოსწავლეებმა საბუნებისმეტყველო საგნებში აჩვენეს. ეს კი იმის გამო მოხდა, რომ ცუდი თარგმანი იყო.

- ”ბავშვები ამბობდნენ, რომ ამოცანის შინაარსი არ ესმოდათ. განსაკუთრებით, ფიზიკა, ქიმია და მატემატიკა გაუჭირდათ. გარდა ამისა, იყო რამდენიმე შემთხვევა, რომ ინტერნეტი გაითიშა და პასუხები დაიკარგა”, - ამბობს დირექტორი.

მისივე განცხადებით, საკმაოდ ბევრნი არიან ისეთი მოსწავლეები, რომელთაც ბარიერის გადასალახად მხოლოდ მეასედები დააკლდათ. ამავე დროს, არა ყველა, არამედ მხოლოდ რამდენიმე საგანში. ასეთ მოსწავლეებს შორის წარჩინებული მოსწრების მქონეებიც მოხვდნენ.

- ”დააკლდათ მაგალითად, 0,02 ან 0,03 ქულა და დარჩნენ ატესტატის გარეშე”, - ამბობს დირექტორი.

ადმინისტრაცია ვარაუდობდა, რომ ასეთ მოსწავლეებს გამოცდებს ხელახლა გადააბარებინებდნენ ან შეღავათს მისცემდნენ, თუმცა, მათი მოლოდინი არ გამართლდა.

დირექტორის განცხადებით, ყველაზე კარგი ქულები მეთორმეტეკლაასელებმა ქართულის გამოცდაში მიიღეს. ოცმა მოსწავლემ უმაღლესი შეფასება, ათი ქულა გამოიტანა.

ასევე კარგი შედეგები აჩვენეს რუსულის, ინგლისურის, ისტორიისა და გეოგრაფიის გამოცდებში.

[თინათინ ზაზაძე, ახალციხე]