მეთორმეტეკლასელები დღეს ფიზიკის გამოცდას აბარებენ

მეთორმეტე კლასის მოსწავლეებს ყველაზე მეტად ფიზიკის გამოცდის ჩაბარების ეშინოდათ. თუმცა, ბარიერის გადალახვა არ გასჭირვებიათ.

მეექვსე საჯარო სკოლის მოსწავლის ალექსანდრე ბერიძის თქმით, კითხვები საშუალო სირთულის იყო და პასუხების გაცემა არ გასჭირვებია: ”7,53 ქულა მივიღე და შედეგით კმაყოფილი ვარ, რადგან ფიზიკა, ქიმია და ბიოლოგია ყველაზე რთული საგნებია”.

მეექვსე საჯარო სკოლაში 23 მეთორმეტეკლასელია. სკოლის დირექტორი ზაზა თამარაშვილი გამოცდების შედეგებით კმაყოფილია და იმედი აქვს, რომ გასული სასწავლო წლის მსგავსად, სკოლის დამამთავრებელ ატესტატს ყველა მეთორმეტეკლასელი მიიღებს.

”მიუხედავად იმისა, რომ ამ გამოცდის ყველას ეშინოდა, ბავშვები კარგი შედგებით გამოდიან. ერთმა მოსწავლემ დღეს ათი ქულა მიიღო”, - ამბობს ზაზა თამარაშვილი.

ახალციხის დამოუკიდებელ სკოლა ”მზექას” წელს 20 მოსწავლე ამთავრებს. სკოლის დირექტორი ბელა კაპანაძე ამბობს, რომ ბავშვები გამოცდებს მომზადებულები შეხვდნენ, რაც მათ საგამოცდო ქულებზეც აისახება.

”8,14 ქულა მივიღე, თუმცა უფრო მეტიც შემეძლო, ცოტა ვინერვიულე და ალბათ იმიტომ. საკმაოდ ადვილი გამოცდა იყო, თუმცა ყველაზე მეტად ამის მეშინოდა”, - ამბობს მეთორმეტე კლასის მოსწავლე ბექა გელაშვილი.

ფიზიკის გამოცდის შემდეგ, მეთორმეტე კლასის მოსწავლეებს ორ დღიანი შესვენება აქვთ, ხოლო დარჩენილ გამოცდებს, ქიმიაში, ბიოლოგიასა და მათემატიკაში მომავალ კვირაში ჩააბარებენ.

[თამარ თოთაძე, ახალციხე]