'ოცნების' მერობის კანდიდატმა წინასაარჩევნო შეხვედრები დაიწყო

გიორგი კოპაძემ ადგილობრივებს საარჩევნო პროგრამა გააცნო და უბნის მაჟორიტარი წარუდგინა.

„პირველ რიგში ქალაქში უნდა დავიწყოთ ინფრასტრუქტურის მოწესრიგება. მოასფალტებული ქუჩები კარგია, მაგრამ ასფალტის ქვეშ არ არის კომუნიკაციები. ამ უბანში ჩანს, რომ კანალიზაციაა მოუწესრიგებელი, ცენტრალურ ქუჩებზე ხშირად იქმნება პრობლემა, სადარბაზოები და სარდაფები ივსება წყლით და ეს დიდი პრობლემაა“, – განაცხადა ამომრჩეველთან შეხვედრისას გიორგი კოპაძემ.

მერობის კანდიდატმა ყურადღება უმუშევრობაზეც გაამახვილა და მოსახლეობას დაჰპირდა, რომ მისი მერად არჩევის შემთხვევაში ყველა დაგეგმილ პროექტში ადგილობრივები დასაქმდებიან: „ხელშეკრულებაში იქნება ჩადებული, რომ დასაქმდეს ადგილობრივი მოსახლეობა. თუ არ შესრულდება ეს, მაშინ ის კომპანია ტენდერს ვერ მოიგებს. გარდა ამისა, ახალციხეში მინიმუმ ერთი ახალი საწარმო გაიხსნება, სადაც 250 სამუშაო ადგილი იქნება“, – განაცხადა კოპაძემ.

მისივე თქმით, ქალაქში მოსაწესრიგებელია პარკირების პრობლემა, გარდა ამისა, უნდა დაინიშნოს საქალაქო ტრანსპორტი სხვადასხვა მიმართულებით.

„ყველაზე მთავარი კი, რაც მინდა გავაკეთო, ეს არის საზოგადოებრივი საბჭოს შექმნა. თითოეულ ადამიანს უნდა შეეძლოს ქალაქის მართვაში მონაწილეობა“, – აღნიშნა გიორგი კოპაძემ.

საარჩევნო პროგრამის გაცნობის შემდეგ, კოპაძემ ადგილობრივებს იმ მაჟორიტარული საარჩევო ოლქის დეპუტატი მამუკა მიქელაძე წარუდგინა. იმ მაჟორიტარულ ოლქში, სადაც მამუკა მიქელაძე იყრის კენჭს, თამარაშვილის ქუჩის გარდა, რაბათისა და ეგრეთ წოდებული სადგურის დასახლება შედის.

„ჩვენს ქუჩაზე და მთლიანად ქალაქში ძალიან ბევრი პრობლემაა. პირველ რიგში შევხვდები მოსახლეობას, გავეცნობი მათ პრობლემებს, მერე მათთან ერთად დავგეგმავ, რომელი პრობლემაა პირველ რიგში მოსაწესრიგებელი“, – ამბობს მამუკა მიქელაძე.

შეხვედრაზე მისული ამომრჩევლები „ქართული ოცნების“ წარმომადგენლებს მათი დასახლების პრობლემებზე ესაუბრნენ
ივანე ახალციხელის ქუჩაზე მცხოვრები შოთა კაპანაძე ამბობს, რომ 10 წლის განმავლობაში ხელისუფლებას მიმართავდნენ ამ ქუჩაზე არსებული პრობლემები მოეგვარებინა, თუმცა უშედეგოდ.

„10 წელია ვითხოვთ, გააკეთონ წყალი, კანალიზაცია და გზა. სამწუხაროდ, მხოლოდ არჩევნების დროს მოდიოდნენ, გვპირდებოდნენ, რომ არჩევნებში გამარჯვების შემთხვევაში გააკეთებდნენ. მას მერე ბევრმა არჩევნებმა გაიარა, თუმცა პრობლემა არ მოგვარდა“,– ამბობს შოთა კაპანაძე და იმედი აქვს, რომ ივანე ახალციხელის ქუჩაზე არსებული პრობლემები ამ არჩევნების შემდეგ მაინც მოგვარდება.

[თამარ თოთაძე, ახალციხე]