„საქართველოს რესპუბლიკური პარტიის“ თავმდჯომარე ხათუნა სამნიძე და პარტიის ლიდერი დავით ბერძენიშვილი სამცხე–ჯავახეთში წინასაარჩევნო შეხვედრებს მართავენ.
8 ივნისს ისინი ადიგენის მუნიციპალიტეტში მცხოვრებ მოსახლეობას შეხვდნენ, 9 ივნისს ახალციხეში, „ქართული ოცნების“ მერობის კანდიდატთან ერთად გამართეს შეხვდრა, 10 ივნისს კი ასპინძის მუნიციპალიტეტში გაემგზავრნენ. დავით ბერძენიშვილი დარწმუნებულია, რომ კოალიცია „ქართული ოცნების“ კანდიდატები არჩევნებში დიდი უპირატესობით გაიმარჯვებენ.
„ჩემი მხარდაჭერა კი არ სჭირდება ჩვენს კანდიდატებს, ან რომელიმე სხვა დეპუტატს „ქართული ოცნებიდან“, მე მინდა ვიყო თანაზიარი იმ წარმატების, რის მოლოდინშიც ვართ 15 ივნისის თვითმმართველობის არჩევნებზე“, – ამბობს დავით ბერძენიშვილი.
წინასაარჩევნო შეხვედრა ახალციხეში ვარძიის ქუჩაზე გაიმართა. „ქართული ოცნების“ მერობის კანდიდატმა გიორგი კოპაძემ მოსახლეობას საარჩევნო პროგრამა გააცნო და ამ უბნის მაჟორიტარი დეპუტატობის კანდიდატი თამარ გოგოლაძე წარუდგინა.
როგორც დავით ბერძენიშვილი ამბობს, მაშინ როცა ახალციხეში ოპოზიციური საქმიანობა ჭირდა, თამარ გოგოლაძე ოპოზიციური აზრის ბურჯი იყო.
„მაშინ ჩვენ ძალიან ცოტა ხალხი გვხვდებოდა და მე ვალს ვუბრუნებ ამ ხალხს. პოლიტიკური კულტურა მოითხოვს, როცა გიჭირდა, ხალხს სთხოვდი შეხვედრას, ისინი კი რისკავდნენ და მოდიოდნენ, ახლა, როცა პოლიტიკურად გილხინს, არ დაამადლო აზრების მიწოდება, რას და როგორ აპირებ“, – ამბობს დავით ბერძენიშვილი და იმედი აქვს, რომ „ქართული ოცნება“ 15 ივნისს არჩევნებს მოიგებს და საქართველოში ერთ–ერთი საუკეთესო მერი ახალციხეს ეყოლება.
გიორგი კოპაძის თქმით, როგორც დავით ბერძენიშვილმაც აღნიშნა, ყველაზე მნიშვნელოვანი თავისუფლებაა, რომელიც „ქართულმა ოცნებამ“ მოიტანა.
„ჩემი აზრითაც, ეს არის ყველაზე მთავარი, რომ ყველა ადამიანი თავისუფალია და თავისი ნების გამოხატვა შეუძლია. გარდა ამისა, ჩვენ დღეს ვისაუბრეთ იმ პრობლემებზე, რომელიც ქალაქს აწუხებს და აუცილებლად მოვაგვარებთ ჩემი მერობის შემთხვევაში“, – ამბობს გიორგი კოპაძე.
ვარძიის ქუჩის მაჟორიტარი დეპუტატობის კანდიდატი თამარ გოგოლაძე ამბობს, რომ წინასაარჩევნო კამპანიის დროს თითოეული ქუჩა შემოიარა. მოუწესრიგებელ ინფრასტრუქტურასთან ერთად, გოგოლაძე პირველ პრობლემად უმუშევრობას ასახელებს.
„ნომერ პირველ პრობლემად არამარტო ახალციხეში, არამედ მთელ საქართველოში რჩება დასაქმების პრობლემა. ეს ის პრობლემაა, რომელსაც მე მარტო ვერ მოვაგვარებ, თუმცა საკრებულოს, მერიის ერთობლივი მუშაობით, შეიძლება მოგვარდეს. გარდა ამისა, მე მაქვს ჩანაფიქრი ქალების დასაქმებასთან დაკავშირებით, რომელსაც აუცილებლად განვახორციელებ“, – ამბობს თამარ გოგოლაძე.
ვარძიის ქუჩაზე მცხოვრები მოსახლეობა ამბობს, რომ „ქართული ოცნების“ მერობისა და მაჟორიტარობის კანდიდატებს კარგად იცნობენ და იმედი აქვთ, რომ დანაპირებს შეასრულებენ.
„ჩვენ ამ ხალხის კმაყოფილები ვართ და იმედი გვაქვს, რომ ახალციხელებს გაუმართლებენ იმედებს და ყველა პრობლემას მოაგვარებენ“, – ამბობს ადგილობრივი ეკატერინა ლომიძე.
[თამარ თოთაძე, ახალციხე]