ბორჯომში ორი სკვერის რეაბილიტაცია მიმდინარეობს

შინმოუსვლელათა პარკში სარეაბილიტაციო სამუშაოებს ტენდერში გამარჯვებული კომპანია შპს „ინტერპლიუსი“ ასრულებს. 128.500 ლარით დაგეგმილია სასეირნო ბილიკების მოწყობა, ნიადაგისა და ქვაფენილის მოწესრიგება, ამუშავდება შადრევანი, მოეწყობა საბავშვო გასართობი მოედანი, განათება, წყლის ბიუეტი. პარკის ტერიტორია ცენტრალური ტრასისგან ღობით გამოიყოფა. პარკში ასევე განთავსდება ომში დაღუპული ბორჯომელი გმირების მემორიალი.

რაც შეეხება ჩაიკოვსკის სახელობის სკვერის რეაბილიტაციას,აქ სამუშაოებს შპს „რემმშენი–ბორჯომი“ ასრულებს.
ჩაიკოვსკის სახელობის სკვერში დაგეგმილია სასეირნო ბილიკების მოწყობა, აუზ–შადრევნის დაპატარავება, გამწვანება, სკვერის გარშემო დაბალი, ტროტუარისგან გამყოფი დეკორატიული მეტალის ღობის მოწყობა, სარწყავი სისტემისა და წყლის ბიუეტის დამონტაჟება. ასევე დაიდგება სკამები და ნაგვის ურნები.

გარდა ამისა, სკვერის განათების მოსაწყობად ადგილობირვი ბიუჯეტიდან დამატებით 15.888 ლარი გამოიყო.
ბორჯომის მუნიციპალიტეტის გამგეობაში განმარტავენ, რომ აღნიშნული სკვერების რეაბილიტაცია ორ თვეში დასრულდება.

[sknews.ge]