ახალციხის მერობის ოთხი კანდიდატიდან 2–მა არჩევანი უკვე დააფიქსირა

საარჩევნო უბანზე ორივე კანდიდატი თითქმის ერთდროულად მივიდა.

გელა დემეტრაძე საარჩევნო უბანს სიის პირველ ნომერთან, ზურა სადათიერაშვილთან ერთად ესტუმრა.

"ხმა მივეცი ნათელ მომავალს. იმედი მაქვს, რომ ყველაფერი სასიკეთოდ შეიცვლება. ვის მივცემდი ხმას, ცხადია საიდუმლო არ არის. იმედი მაქვს, რომ დღევანდელი დღე ექსცესების გარეშე ჩაივლის", – განაცხადა მერობის კანდიდატმა.



დემეტრაძის მისვლიდან რამდენიმე წუთში მივიდა ამავე უბანზე მერობის მეორე კანდიდატი გოჩა ათოშვილი. მერობის კანდიდატი უბანზე შვილთან ერთად მივიდა, რომელიც ასევე სრულწლოვანია და ამომრჩეველია.

გოჩა ათოშვილმა განაცხადა, რომ ხმა მისცა საქართველოს უკეთეს მომავალს, თუმცა, გელა დემეტრაძისგან განსხვავებით, მან განაცხადა, რომ არჩევნების მშვიდად დასრულების იმედი ნაკლებად აქვს: "რამდენიმე კვირის წინ მძიმე სიტუაციები იყო და ამდენად, არ ვარ დარწმუნებული, რომ დღე ექსცესების გარეშე ჩაივლის".



ამავე უბანზე დააფიქსირებს არჩევანს მმართველი გუნდის მერობის კანდიდატი გიორგი კოპაძეც. იგი ჯერ უბანზე არ მისულა.

უბანზე 1128 ამომრჩეველია რეგისტრირებული. 09:50 საათის მდგომარეობით არჩევანი უკვე დააფიქსირა 80–მა ამომრჩეველმა.

[sknews.ge]