ავარიას შვიდი ადამიანის სიცოცხლე ემსხვერპლა

ქუთაისის სასწრაფო სამედიცინო დახმარების სამსახურის მენეჯერის მაია რუხაძის თქმით, პირველადი ინფორმაციით, შემთხვევის შედეგად შვიდი ადამიანი გარდაიცვალა. ხუთი დაშავებული სასწრაფო დახმარების სამსახურმა ქუთაისის სამხარეო კლინიკურ საავადმყოფოში გადაიყვანა. ამათგან, ოთხის მდგომარეობა სტაბილურია, პაციენტებს მსუბუქი დამწვრობა აღენიშნებათ და მათ სიცოცხლეს საფრთხე არ ემუქრება. ერთი პაციენტი კი ამ წუთებში თბილისის დამწვრობის ცენტრში გადაჰყავთ.

შემთხვევა სოფელ ბარდუბანთან მოხდა. როგორც ირკვევა, "შკოდას" მარკის ავტომანქანა ჯერ "ბეემვეს" შეეჯახა, შემდეგ კი მიკროავტობუსს. შეჯახების შედეგად ”მარშუტკას” ცეცხლი გაუჩნდა.

შემთხვევის ადგილას მობილიზებულია სასწრაფო, სამაშველო და სახანძრო სამსახურები.

გავრცელებული ინფორმაცია, რომ მიკროავტობუსი ახალციხე-ქუთაისის რეისს ასრულებდა, სიმართლეს არ შეესაბამება. როგორც ”სამხრეთის კარიბჭეს” ახალციხის ავტოსადგურში დაუდასტურეს, ეს არის ახალქალაქი-ბათუმის მარშრუტზე მოძრავი მიკროავტობუსი, რომელსაც ახალქალაქის მცხოვრები მართავდა. მიკროავტობუსი ახალქალაქიდან მიემართებოდა.

”სამხრეთის კარიბჭე” დეტალების დაზუსტებას ამ წუთებშიც ცდილობს.

[ნინო ნარიმანიშვილი, ახალციხე]