6 დაღუპული, 5 დაშავებული

როგორც ქუთაისის საინფორმაციო სააგენტო newpress-ი წერს, დაღუპულების შესახებ ინფორმაცია იმერეთის საგანგებო სიტუაციების მართვის სამსახურმა გაავრცელა. ექვსი გარდაცვლილიდან ხუთი ახალქალაქი-ბათუმის მიმართულებით მოძრავი სამგზავრო მიკროავტობუსის მგზავრია, ერთი კი მსუბუქი ავტომობილის.

"დიდი ხანძარი იყო, მანქანით რომ მივუახლოვდით მიკროავტობუსიც და მსუბუქი ავტომობილიც საშინელ ცეცხლში იყო გახვეული, ადამიანები მოჩანდნენ, მაგრამ ვერავინ ვერ ეკარებოდა ახლოს. სახანძრო დიდხანს არ გამოჩენილა, არც გზაში შეგვხვედრია," – ამბობს თვითმხილველი ნათია კუპრაშვილი, რომელიც თბილისიდან ქუთაისში მიემგზავრებოდა.

”დღის სამ საათზე შემოვიდა შეტყობინება საგანგებო სიტუაციების მართვის სამსახურში ავტოსაგზაო შემთხვევის შესახებ. დაუყოვნებლივ გავიდა ჯგუფი. ადგილზე მისვლისას დაგვხვდა ავარია თბილისი-სენაკი-ლესელიძის მაგისტრალზე, ბარდუბნის მონაკვეთზე. „სპრინტერის“ ტიპის მიკროავტობუსი შეჯახებულია „შკოდას“ ტიპის ავტომობილს. გაჩნდა ცეცხლი და დაიწვა ექვსი მგზავრი,“ - აღნიშნა იმერეთის საგანგებო სიტუაციების მართვის სამსახურის უფროსმა სპეციალისტმა არჩილ ძებაშვილმა, წერს სააგენტო.

ავტოავარიის შედეგად გარდაცვლილები ექსპერტიზაზე არიან გადაყვანილი. ოთხი დაშავებული ამ დრომდე ქუთაისის სამედიცინო დაწესებულებებში რჩება. ერთი კი მძიმე დამწვრობით თბილისის დამწვრობის ცენტრში გადაიყვანეს.

როგორც ”სამხრეთის კარიბჭემ” გაარკვია, დაშავებულების ახლობლები ახალქალაქიდან უკვე გაემგზავრნენ ქუთაისის მიმართულებით. მძღოლის ოჯახთან დაკავშირება ამ დრომდე ვერ ხერხდება.

[ნინო ნარიმანიშვილი, ახალციხე]