ახალციხეში, თამარაშვილის ხიდიდან ფოცხოვში ახალგაზრდა მამაკაცი გადახტა

მომხდარის შესახებ სამაშველო სამსახურში შეტყობინება 13:30 საათზე შევიდა. მაშველები დაკარგულს 19:00 საათამდე ეძებდნენ.

„გადავკეტეთ მდინარე, მობილიზდა სამაშველო სამსახური“, - ამბობს სამცხე-ჯავახეთის გუბერნატორის ადმინისტრაციის საგანგებო სიტუაციების მართვის სამსახურის უფროსი კობა კურტანიძე.

მისი თქმით, უშედეგო ძებნის შემდეგ, თამარაშვილის ხიდის მიმდებარე ტერიტორიაზე არსებული „PSP“- ს აფთიაქისა და მიკროსაფინანსო ორგანიზაცია „კრედოს“ სათვალთვალო კამერების ჩანაწერები ამოიღეს. ჩანაწერებიდან გაირკვა, რომ ახალგაზრდა უვნებელი გადარჩა.

„ჩანაწერებში ჩანს, რომ ოთხი ახალგაზრდა მიდის ხიდზე და მათ შორის ერთ-ერთი მდინარეში ხტება. ასევე, ჩანაწერებში ჩანს, უკვე მდინარიდან ამოსული, სველი როგორ ბრუნდება უკან. ალბათ გაცურა, შესაძლოა ნაპირზეც ჩაეჭიდა რამეს და ამოვიდა“, - ამბობს კურტანიძე.

[თამუნა უჩიძე, ახალციხე]