ახალციხის ცენტრში კორპუსების ფასადებს შეღებავენ

ახალციხის ცენტრში, კოსტავას ქუჩაზე მდებარე სამი კორპუსის ფასადის შესაღებად, 2014 წლის ადგილობრივი ბიუჯეტიდან, 112.670 ლარია გამოყოფილი.

მიმდინარე წელს რეაბილიტაცია ჩაუტარდება ასევე კოსტავას ქუჩაზე მდებარე, გამგეობის ყოფილ შენობას. ამისთვის, ადგილობრივ ბიუჯეტში 317.000 ლარია გათვალისწინებული.

110.000 ლარით ნაგავმზიდს შეიძენენ, 40.000 ლარით კი ნაგვის კონტეინერებს.

ახალციხის მუნიცპალიტეტის გამგებლის მოვალეობის დროებით შემსრულებელი მალხაზ ჟუჟუნაძე ამბობს, რომ ახალციხის მუნიციპალიტეტს ამ ეტაპზე ერთი ნაგავმზიდი ჰყავს, მეორე მანქანის შეძენით კი ადგილობრივი თვითმმართველობის არჩევნების შემდეგ, თვითმმართველობას ქონების გაყოფა გაუადვილდება: „ერთი მანქანა თვითმმართველ ქალაქს დარჩება, მეორე კი მუნიციპალიტეტს გადაეცემა“.

რაც შეეხება ნაგვის კონტეინერებს, მალხაზ ჟუჟუნაძე ამბობს, რომ ახალ კონტეინეტრებს ქალაქის ქუჩებში გაანაწილებენ, ძველი ურნები კი შესაძლოა სოფლებში დადგან.

ჟუჟუნაძის მტკიცებით, აღნიშნული ოთხი პროექტის გარდა, მიმდინარე წელს ადგილობრივი ბიუჯეტიდან კიდევ 10–მდე პროექტი დაფინანსდება.

„სანამ ჩვენ ვიქნებით, ყველანაირად ვეცდებით, რომ ეს პროექტები განვახორციელოთ. ხოლო ჩვენს მერე ვინც იქნება იმ პროცესში გადავცემთ, რა პროცესშიც იქნება იმ დროისთვის“, – განმარტავს მალხაზ ჟუჟუნაძე.

[თამარ თოთაძე, ახალციხე]