ახალციხის სოფლებში ნაგვის კონტეინერებს დადგამენ

ახალციხის მუნიციპალიტეტის გამგეობაში განმარტავენ, რომ სოფლებისთვის დაახლოებით 400 კონტეინერის შეძენას გეგმავენ. თითო კონტენიერი მუნიციპალიტეტს 600–700 ლარი უჯდება.

აქამდე ნაგვის კონტეინერები მარტო ცენტრალურ გზებზე არსებულ სოფლებში იდგა. იმ სოფლებში, სადაც კონტეინერები დაიდგმება, ნაგავმზიდი კვირაში სავარაუდოდ ორჯერ მივა. სოფლებიდან გამოტანილი საყოფაცხოვრებო ნარჩენები ახალციხის ნაგავსაყრელზე დაიყრება.

მუნიციპალიტეტის გამგეობაში განმარტავენ, რომ ამ ეტაპზე მოსახლეობა საყოფაცხოვრებო ნარჩენების გადასახადს არ გადაიხდის. მას შემდეგ, რაც კონტეინერებს ყველა სოფელში დადგამენ, გადასახადიც დაწესდება, ერთ სულ მოსახლეზე 50 თეთრი, ოჯახზე არაუმეტეს ორი ლარისა. იმ ქუჩებზე, სადაც კონტეინერები არ იქნება, მოსახლეობა გადასახადს არ გადაიხდის.

[თინათინ ზაზაძე, ახალციხე]