გაერომ წაღვერში გიდები გადაამზადა

გიდებმა ხუთკვირიანი სასწავლო კურსი გაიარეს. ტურიზმის ტერმინების დეფინიცია, მომხმარებელთა უფლებების დაცვა, მოგზაურობა და კულტურული შოკი, მარშრუტის დამუშავება, სამგზავრო ინფორმაციის ტექსტი და მისი მომზადება, სამახსოვრო ტექსტების მომზადება, სტუმართმოყვარეობის მენეჯმენტის შემადგენელი ელემენტები, მოქცევის ეტიკეტი და დიალოგი ტურისტთან - იმ საკითხების მცირე ჩამონათვალია, რომლებზეც გიდებს ტრენინგები ჩაუტარდათ.

გაეროს განვითარების პროგრამის - „მდგრადი განვითარება და გარემოს მიმართ პასუხისმგებლობა“ - ფარგლებში, გიდები, ასოციაცია „ტოლერანტთან“ არსებული სასწავლო-პროფესიულმა ცენტრმა „პროფესიონალმა“ გადაამზადა. პრეოქტის ფინანსური მხარდამჭერი ფინეთის მთავრობაა.

ასოციაცია „ტოლერანტის“ თავმჯდომარის ცირა მესხიშვილის განცხადებით, აღნიშნული პროექტის ფარგლებში წაღვერში ტურისტული ცენტრიც გაიხსნა: „ასე ჩვენ ხელს შევუწყობთ წაღვერის საკურორტო და ტურისტული პოტენციალის განვითარებას. ახალგაზრდებს გადამზადების შემდეგ სამომავლოდ ძალიან ბევრი კარგი იდეა გაუჩნდათ“.

გადასამზადებელი კურსი 14-მა მონაწილემ გაიარა, თუმცა კურსი 10-მა დაასრულა. პროექტის ფარგლებში მომავალ ტურისტულ სეზონზე გადამზადებული გიდების დასაქმება იგეგმება.

[თამუნა უჩიძე, ახალციხე]