”მესხეთის ტურები” გიდების გადამზადებას იწყებს

სააგენტო ორი წელია არსებობს და სამცხე-ჯავახეთის მასშტაბით სხვადასხვა სახის ტურებს ახორციელებს. სათავგადასავლო, შემეცნებითი და კლიენტის სურვილის მიხედვით შედგენილი ტურები რეგიონის სხვადასხვა მუნიციპალიტეტებში ეწყობა და ამ სერვისით, როგორც ქართველი ასევე, უცხოელი ტურისტები სარგებლობენ.

ტურისტული სააგენტოს რამდენიმე კვალიფიციური გიდი უკვე ჰყავს. თუმცა, ”მესხეთის ტურების” დამფუძნებლის გიორგი ნათენაძის თქმით, რეგიონში მიმდინარე მშენებლობების ფონზე სააგენტოს მომავალში სრული ტურისტული მომსახურებისათვის უფრო მეტი გიდი დასჭირდება.

პროექტის ფარგლებში სამცხე-ჯავახეთის მასშტაბით 30 ახალგაზრდა გიდი გადამზადდება.

- ”უკვე დაიწყო შესარჩევი კონკურსი, რომელიც ორ ეტაპად ჩატარდება. პირველი ეტაპი მსურველების მიერ აპლიკაციების ფორმების შევსება, ხოლო მეორე ეტაპი გასაუბრება იქნება”, - განმარტავს გიორგი ნათენაძე.

კონკურსში მონაწილეობის მსურველებმა, 25 ივლისამდე, არასამთავრობო ორგანიზაცია ”ტოლერანტს” უნდა მიაკითხონ, სადაც სპეციალურ აპლიკაციას შეავსებენ.

კონკურსში მონაწილეობისთვის აუცილებელია მინიმუმ ერთი უცხო ენის ცოდნა, სასურველია ინგლისური ან რუსული. მონაწილეობის მიღება სხვა უცხო ენების მცოდნეებსაც შეუძლიათ.

- ”ვფიქრობ რომ დაგვჭირდება თურქულის, სომხურის, გერმანულის, ფრანგულისა და სხვა ენების სპეციალისტებიც”, - ამბობს გიორგი ნათენაძე.

მას შემდეგ, რაც გიდები გადამზადდებიან, შეიქმნება სპეციალური ვებ-გვერდი, რომელზეც ტურისტული მარშრუტებისა და გიდების მომსახურების შესახებ ინფორმაცია დაიდება.

- ”ჩვენ მაქსიმალურად შევეცდებით გადამზადებული გიდები დავასაქმოთ, თუმცა, ეს დამოკიდებული იქნება ტურისტების რაოდენობაზე”, - განმარტავს გიორგი ნათენაძე

[თამარ თოთაძე, ახალციხე]