რას ნანობენ „ნაციონალები“

დღეს, 3 მაისს „ერთიანი ნაციონალური მოძრაობის“ ლიდერები გიორგი ბარამიძე და გიგი უგულავა ახალციხეში, მესხეთის თეატრში, „ნაციონალური მოძრაობის“ მხარდამჭერებს შეხვდნენ და რეგიონში პარტიის კანდიდატები დაასახელეს. შეკრებილ აუდიტორიას პირველმა ახალციხის მაჟორიტარმა დეპუტატმა ვაჟა ჩიტაშვილმა მიმართა და სიტყვა საპარლამენტო უმცირესობის ერთ-ერთ ლიდერს გიორგი ბარამიძეს გადასცა.

„მიხარია, რომ ჩვენს პარტიას ამდენი წარმომადგენელი ჰყავს და ბუნებრივია, ეს არ არის სრული შემადგენლობა ჩვენი აქტივის. თანამებრძოლები გვემატებიან და უფრო მეტი ვხდებით“, - განაცხადა ბარამიძემ.

მისი თქმით, მაშინ, როცა „ნაციონალები“ ხელისუფლების სათავეში იყვნენ, წინსვლასთან ერთად შეცდომებიც იყო: „გვქონდა გადაცდომებიც, თუმცა არასდროს დაგვიმალავს, თვალის გასწორება არასდროს შეგვშინებია. ამათ კი სულ გააჩერეს ქვეყანა. ხალხი ხედავს ამას. დროა ექსპერიმენტებს თავი დავანებოთ. არამგონია ოცნებებში კიდევ დარჩეს ვინმე, რადგან ცხვირწინ აფერისტობისა და ტყუილების უამრავი მაგალითი გვაქვს“.

ბარამიძის შემდეგ აუდიტორიას ასპინძის მაჟორიტარმა დეპუტატმა ტარიელ ლონდარიძემ მიმართა: „ამაყი ვარ, რომ დღეს თქვენთან ერთად ვარ. ჩვენი გამარჯვება გარდაუვალია, ამას მოჰყვება ქვეყნის ამუშავება და საქართველო საბოლოოდ გაიმართება წელში“.
კოლეგებისგან განსხვავებით, მონოლოგი გაუგრძელდა გიგი უგულავას. მან „ოცნების“ ცრუ დაპირებებზე და არასწორ პოლიტიკაზე გაამახვილა ყურადღება.

„ერთადერთი, რაც წელიწადნახევრის განმავლობაში იზრდება, კრიმინალი და უმუშევრობაა. თუ ვინმე იამაყებს კრიმინალთან ბრძოლით, ამ ქალაქის მკვიდრი ვანო მერაბიშვილია და ქვეყნის სირცხვილია, როცა ვანო მერაბიშვილი ციხეში ზის და ეს უმაქნისი მინისტრი საკუთარ თავს აიგივებს იანუკოვიჩის მთავრობასთან, მთავრობასთან, რომელმაც უკრაინას თავი მოსჭრა, უკრაინა დააჩოქა“.

უგულავა დარწმუნებულია, რომ მას შემდეგ, რაც უკრაინელი ხალხი პრეზიდენტს აირჩევს, რუსეთს საკადრის პასუხს გასცემს: „მაგრამ, ამ ბრძოლის განმავლობაში, ჩვენ ვხედავდით ჩვენი მთავრობის უნიჭო რიტორიკას. რომ საქართველო არსად არ უნდა გამოჩნდეს, რომ საქართველო არსად არ უნდა გაერიოს, რომ საქართველო არავის პირში არ გაეჩხიროს და არავის პრობლემად არ ექცეს, რომ არც უცხოელებს და არც არავის დედამიწის ზურგზე საქართველო აღარ ახსოვდეთ. ეს არის ამათი საერთაშორისო პოლიტიკა“.

მასი თქმით, სწორედ ამის გამო, მაშინ როცა „ოცნების“ წარმომადგენლებმა სააკაშვილი უკრაინაში დაინახეს, „გაცოფდნენ“: „დაიწყეს ლაპარაკი იმაზე, რომ სააკაშვილი აღარავის აღარ აინტერესებს მსოფლიოში, არადა ამ დროს სააკაშვილი სიენენზე იჯდა და თვითონ კავკასიაზე, აქუბარდიასთან“.

უგულავა „ქართული ოცნების“ კანდიდატების წარდგენასაც შეეხო: „ახალციხის მერობის კანდიდატი რომ წარადგინეს, გახსოვთ ალბათ, უკან ფონი რა იყო, განახლებული რაბათის ციხე. თბილისის მერობის კანდიდატის უკან, განახლებული თბილისი. ქუთაისის მერობის კანდიდატის უკან, განახლებული ბაგრატი, ზუგდიდის მერობის კანდიდატის უკან, გალამაზებული ზუგდიდი. თელავის მერობის კანდიდატის უკან, განახლებული თელავი. ბათუმის მერობის კანდიდატის უკან, სამოთხედ ქცეული ბათუმი. ერთადერთი რასაც ვნანობ, ის არის, რომ ხაშურის მერობის კანდიდატის უკან არაფერი იყო და ეს ჩვენი შეცდომაა, რასაც უნდა მივხედოთ“.

მისი განცხადებით, „ოცნებამ“ არცერთი დაპირება არ შეასრულა. უფრო მეტიც, ბიუჯეტში მილიარდიანი გარღვევა აქვთ, ასეთი რამ კი შევარდნაძის დროსაც არ ხდებოდა.

„დღეს ჩვენ გვეუბნებიან, პარლამენტი რატომ ააშენეთ, ის დახარჯეთ, ეს დახარჯეთო. მილიარდი გაარღვიეთ ხალხო და ეს ჩვენ მაინც ავაშენეთ და დავტოვეთ. ამ აშენებულის ფონზე ახლა დგახართ და თავებს იწონებთ. ესაა უმაქნის და საქმიან ხალხს შორის განსხვავება“, - განაცხადა უგულავამ.

მან გამოსვლა ვანო მერაბიშვილის მიერ ციხიდან გამოგზავნილი წერილის წაკითხვით დაასრულა. შემდეგ კი სამცხე-ჯავახეთში „ნაციონალური მოძრაობის“ კანდიდატები დაასახელა და შეკრებილ საზოგადოებას დაემშვიდობა.

[თამუნა უჩიძე, ახალციხე]