'დარგე შენი მომავალი' - გამწვანების აქცია ახალციხეში

ახალციხის მუნიციპალიტეტის მასშტაბით 3 500 ძირი იფანის, ნეკერჩხლისა და მუხის ხე დაირგვება. ადგილობრივი თვითმმართველობის წარმომადგენლები ხეებს ქალაქში ხელოვნური ტბის მიმდებარე ტერიტორიაზე და რაბათში, ახალციხის ციხეში რგავენ. აქციაში ჩართულია მუნიციპალიტეტის 47-ვე სოფელიც, რომლებსაც გარემოს დაცვის სამინისტროს მიერ გამოყოფილი 3 500 ძირი ნერგი თანაბრად გადაუნაწილდათ.

„ქალაქში სულ 200 ძირი დაირგვება. რამდენიმე ძირი სკოლამდელი აღზრდის დაწესებულებებსაც გავუნაწილეთ, ტბაზე დაახლოებით 150 ძირი იფანი და ნეკერჩხალი დავრგეთ. რაბათში ციხის კი ადმინისტრაცია რგავს“, - ამბობს ახალციხის რწმუნებული დავით სამსონიძე.

მისივე თქმით, ხეების დასარგავად აღნიშნული ადგილები შემთხვევით არ შეურჩევიათ. ტბაც და ახალციხის ციხეც დაცული ტერიტორიაა და აქ დარგულ ხეებს მომავალშიც მოუვლიან.

აქციაში ქალაქის დასუფთავებისა და სახანძრო-სამაშველო სამსახურებიც არიან ჩართული. სახანძრო სამსახურის უფროსის პაატა კბილაშვილის თქმით, ვიდრე ტბას წყლით გაავსებენ, ნარგავებს თავად მოუვლიან.

გამწვანების აქცია საქართველოს გარემოსა და ბუნებრივი რესურსების დაცვის სამინისტროს ინიციატივით მთელი საქართველოს მასშტაბით მიმდინარეობს. ამ ეტაპზე სამცხე-ჯავახეთის ოთხი მუნიციპალიტეტისთვის (ადიგენი, ასპინძა, ახალციხე და ბორჯომი) იფანის, ნეკერჩხალისა და მუხის 14 000 ნერგია გამოყოფილი. ბუნებრივი პირობების გამო, გამწვანების აქცია ახალქალაქსა და ნინოწმინდაში ჯერ არ დაწყებულა.

[თამარ თოთაძე, ახალციხე]