აბონენტებს წყლის დავალიანება უნახევრდებათ

ვენერა ფრანგულიანმა დავალიანება 40 ლარის ოდენობით მანამდე გადაიხადა, სანამ აქციის შესახებ შეიტყობდა.

”თანხა ნაწილ-ნაწილ გადავიხადე. რომ მცოდნოდა კომპანია ვალს გამინახევრებდა, გადახდისგან თავს შევიკავებდი”, - ამბობს იგი.

აბონენტებმა, რომელთაც დავალიანების ჩამოწერა სურთ, საქართველოს გაერთიანებული წყალმომარაგების კომპანიის რეგიონულ სერვის-ცენტრებს უნდა მიმართონ.

დავალიანების მქონე აბონენტი, რომელიც გადაიხდის არსებული დავალიანების 50%-ს, დარჩენილი 50% ჩამოეჭრება. აქცია მხოლოდ საყოფაცხოვრებო მომხმარებლებზე - ფიზიკურ პირებზე ვრცელდება.

რამდენია მოსახლეობის დავალიანება, საქართველოს გაერთიანებული წყალმომარაგების სამცხე-ჯავახეთის რეგიონულმა მენეჯერმა გია ბაგინაშვილმა ჯერჯერობით არ იცის. მისი თქმით, რეგიონის მასშტაბით ამჟამად დავალიანებებს ითვლიან.

მისივე თქმით, დავალიანების ჩამოწერის პროცედურა მარტივია.
აბონენტის განცხადება რეგისტრაციის შემდეგ ბილინგის სამსახურს გადაეცემა, რომელმაც უნდა სეისწავლოს დავალიანების საკითხი: ”შემდეგ მზადდება შედარების აქტი, რომელიც ინკასატორს მიაქვს აბონენტის მისამართზე. ორი ეგზემპლარიდან ერთი რჩება აბონენტთან, ერთი კი ბილნგში ბრუნდება. სერვისცენტრის ხელმძღვანელის შემოწმების შემდეგ, მაქსიმუმ ერთ კვირაში, დოკუმენტი მზად არის. მას შემდეგ რაც აბონენტი გადაიხდის, ბილინგი აკორექტირებს დავალიანებას”.

აბონენტებს გაუნახევრდებათ ის დავალიანება, რომელიც კომპანიის დაარსებიდან, 2010 წლის 14 იანვრიდან 2012 წლის პირველ ივლისამდე დაუგროვდათ.

ამჟამად ახალციხეში დაახლოებით 6000 აბონენტია.

ქალაქის ზოგიერთ უბანში მრიცხველების დამონტაჟება ჯერ ისევ მიმდინარეობს.

”დასასრულს უახლოვდება სამუშაოები საბარგო სადგურსა და მარდის დასახლებაში. შემდეგ სამუშაოები გვარამაძისა და ზარზმელის ქუჩებზე გაგრძელდება”, - განმარტავენ სერვისცენტრში.

თანხა გაუნახევრდებათ იმ აბონენტებსაც, რომლებიც გადასახადს მრიცხველის გარეშე, სულადობის მიხედვით იხდიან.

ბაგინაშვილის განცხადებით, ტარიფების გადახედვა არ იგეგმება . მრიცხველით ერთ ტონაზე გადასახადი 50 თეთრია, სულადობით კი ერთ სულზე 1,77 ლარი.

აქცია 18 ივლისს დაიწყო და 1-ელ ოქტომბრამდე გაგრძელდება. აქციის დასრულებამდე აბონენტს ნებისმიერ დროს შეუძლია გადაიხადოს დავალიანების 50 პროცენტი.

[თინათინ ზაზაძე, ახალციხე]