ასპინძის საავადმყოფო სახელმწიფო მმართველობაში გადავიდა

ამის შესახებ ჯანდაცვის მინისტრობის კანდიდატმა დავით სერგეენკომ განაცხადა. სერგეენკოს განცხადებით, აღნიშნულ კომპანიას ჰქონდა საშუალება საავადმყოფოებში მდგომარეობა გამოესწორებინა, თუმცა უშედეგოდ, ამიტომ, "ადითის“ მფლობელობაში მყოფი საავადმყოფოები მართვაში სახელმწიფოს დაუბრუნდა.

სამცხე-ჯავახეთის რეგიონში კომპანია „ადითის“ მფლობელობაში მხოლოდ ასპინძის საავადმყოფო იყო. საავადმყოფო სახელმწიფო მფლობელობაში მყოფ შპს „რეგიონული ჯანდაცვის ცენტრს“ გადაეცა.

საავადმყოფოს მენეჯერის მანანა ცინაძის განმარტებით, ახალმა ხელმძღვანელობამ საავადმყოფოს უკლებლივ ყველა თანამშრომელს, 3-თვიანი ხელშეკრულება გაუფორმა. რაც შეეხება კომპანია „ადითს“, საავადმყოფოს თანამშრომლებისთვის 6-თვიანი სახელფასო დავალიანებები ამ დრომდე არ დაუფარავს.

„ორი თვის განმავლობაში ჯანდაცვის სამინისტრომ დაგვსვა სპეც დაფინანსებაზე. ერთის თვის ხელფასი უკვე ავიღეთ, რაც შეეხება „ადითს“, ამ დრომდე არ დაუფარავს სახელფასო დავალიანება და საქმე სასამართლოში აქვს“,- ამბობს რეგიონული ჯანდაცვის ცენტრის ასპინძის საავადმყოფოს ხელმძღვანელი მანანა ცინაძე.

შეგახსენებთ, რომ კომპანია „ადითი" ასპინძის საავადმყოფოში 2011 წლის მარტში შევიდა. საავადმყოფოში არაერთი პრობლემა იყო. მიმდინარე წლის იანვარში დაწესებულების მედ-პერსონალი გაიფიცა,მათ სახელფასო დავალიანება და საავადმყოფოში არსებული არასათანადო პირობები გააპროტესტეს. ასპინძის საავადმყოფო ერთ-ერთი იყო იმ სამედიცინო დაწესებულებებს შორის, რომელთა საქმესაც სამთავრობო კომისია სწავლობდა.

[თინათინ ზაზაძე, ასპინძა]