კლინიკა 'ჰემას' ექიმებმა სამცხე-ჯავახეთის მედიკოსებს გამოცდილება გაუზიარეს

მედიკოსები განმარტავენ, რომ მათი ვიზიტი ონკოჰემატოლოგიური დაავადებების მნიშვნელოვნად მატებამ განაპირობა. მათი თქმით, დაავადების ეფექტურ მკურნალობაში დიდი მნიშვნელობა აქვს დროულ დიაგნოსტირებას და ადექვატურ ჩარევას.

რადგან, როგორც წესი, პაციენტთა უმეტესი ნაწილი პირველად ოჯახის ექიმს მიმართავს, სწორედ ამიტომ კონფერენცია თერაპევტების, ოჯახის ექიმების, კარდიოლოგებისა და გინეკოლოგებისთვის ჩატარდა.

„გვინდა ავუხსნათ რაში მდგომარეობს თანამედროვე მედიცინის პრობლემა, რას უნდა მიაქციონ ყურადღება და რა დროს უნდა გააგზავნონ პაციენტი სპეციალიზირებულ კლინიკაში დამატებითი კვლევებისთვის“, - მბობს მედიცინის აკადემიური დოქტორი, ონკოჰემატოლოგიისა და ქიმიოთერაპიის კლინიკა „ჰემას“ თანამშრომელი ნინო შარაშენიძე.

„ჰემას“ მედიკოსებთან ერთად ახალციხეში ჰემოფილიის ცენტრის წარმომადგენლებიც იმყოფებოდნენ. შეხვედრამდე, სამცხე-ჯავახეთის მასშტაბით, ჰემოფილიით დაავადებული 10 პაციენტის ოჯახს მედიკამენტები გადასცეს.

ახალციხეში მყოფი ექიმები, ხვალ 30 მარტს, კლინიკა „იმედში“, მოსახლეობას უფასო გამოკვლევებს ჩაუტარებენ. გამოკვლევები 10:00 საათიდან 13:00 საათამდე გაგრძელდება.

კლინიკა ‘იმედის’ ინფორმაციით, პაციენტებს, რომლებსაც აწუხებთ სისხლის დაავადებები (ანემია, კოაგულოპატია, ონკოჰემატოლოგია) თან უნდა ჰქონდეთ სისხლის საერთო ანალიზი, შესაძლოა ანალიზი გაკეთდეს კლინიკაშივე.

დამატებითი ინფორმაციის მიღება შესაძლებელია ნომრებზე: (365)–22–50–80 მობ. 599–24–25–60.

[თინათინ ზაზაძე, ახალციხე]