კლინიკა ‘იმედში’ ფინანსთა სამინისტროს საგამოძიებო სამსახური შევიდა

ფინანსთა სამინისტროს საგამოძიებო სამსახურის საგამოძიებო დეპარტამენტის სამცხე-ჯავახეთის სამმართველომ კლინიკის შემოწმება გასულ კვირას დაიწყო.

ფინანსთა სამინისტროს საზოგადოებასთან ურთიერთობის სამსახურში ფაქტს ადასტურებენ, თუმცა, თავს იკავებენ დეტალებზე საუბრისგან.
სამცხე–ჯავახეთის საოლქო პროკურატურის ინფორმაციით, კლინიკა „იმედის“ საქმეზე ძიება სისხლის სამართლის კოდექსის 182–ე მუხლით მიმდინარეობს, რაც მითვისება–გაფლანგვას გულისხმობს.

საქმის ნაწილი, რითაც გამოძიება დაინტერესდა კაპიტაციურ ტარიფს ეხება. კაპიტაციური ტარიფი ამბულატორიული მომსახურების საფასურს გულისხმობს. საყოველთაო დაზღვევის პროგრამის ფარგლებში, სახელმწიფო ქალაქში მცხოვრებ ერთ მოქალაქეს 2 ლარს ურიცხავს. თანხა იმ კლინიკაში ირიცხება, სადაც ეს კონკრეტული ადამიანია რეგისტრირებული. სოფელში ერთ მოქალაქეზე სახელმწიფო 0.80 ლარს რიცხავს. სოფელში მცხოვრებს ოჯახის ექიმი ემსახურება.

დაუდასტურებელი ინფორმაციით, კლინიკა „იმედში“ სოფელში მცხოვრები პაციენტები ქალაქში მცხოვრებლებად ჰყავთ რეგისტრირებული. ეს ნიშნავს, რომ საავადმყოფო სახელმწიფოსგან კუთვნილი 0.80 ლარის ნაცვლად 2.00 ლარს იღებს.

კლინიკა „იმედის“ ხელმძღვანელს დავით მაისურაძეს მომხდარზე საუბარი არ სურს: „ვერანაირ კომენტარს ვერ გავაკეთებ“.

პროკურატურაში გვიდასტურებენ, რომ საქმე ზოგადად კაპიტაციურ პროგრამას ეხება, თუმცა დეტალებზე არ საუბრობენ.

„იმედმა“ ფუნქციონირება 2013 წლიდან დაიწყო. საკუთარი კლინიკა ახალციხის რაიონული საავადმყოფოს ყოფილმა მენეჯერმა დავით მაისურაძემ გახსნა.

[თამუნა უჩიძე, ახალციხე]