ახალციხეში ონკოლოგიურ დაავადებებზე იმსჯელეს

სამეცნიერო კონფერენცია დღეს, 12 ივლისს „უნიმედი სამცხეს“ ახალციხის სამედიცინო ცენტრში გაიმართა.

"მედულას" მედიკოსებმა ძუძუს, პროსტატის, ფარისებრი ჯირკვლის, საკვერცხის კიბოს დიაგნოსტიკასა და მკურნალობაზე, ასევე შარდის შეუკავებლობის დიაგნოსტიკასა და მკურნალობაზე გააკეთეს მოხსენებები.

„ის რაც ჩვენ ვიცით ონკოლოგიაში, ერთმანეთს უნდა გავუზიაროთ. ამიტომ გადავწყვიტეთ ერთმანეთს შევხვედრილიყავით“,- ამბობს კლინიკა „მედულას“ მთავარი ქირურგი ბადრი სეფაშვილი.

ახალციხის შემდეგ კლინიკა „მედულას“ ექიმები ახალქალაქს ესტუმრებიან, სადაც ონკოლოგიური დაავადებების ადრეული გამოვლინების მიზნით საქველმოქმედო აქციას გამართავენ.

„დიაგნოსტიკის შემდეგ პაციენტების მიღებას ახალციხეში ვგეგმავთ, რადგან მათ შედარებით ადვილად შეუძლიათ აქ მოსვლა და მკურნალობას დროულად დავიწყებთ“,-აცხადებს კლინიკა „მედულას“ კლინიკური ონკოლოგი მარიამ ჟვანია, რომელიც ამავდროულად „უნიმედი სამცხეს“ ახალციხის სამედიცინო დაწესებულებაშიც მუშაობს.

შეგახსენებთ, რომ ახალციხის სამედიცინო დაწესებულებაში ონკოლოგიური განყოფილება თვეზე მეტია რაც გაიხსნა. ახლად გახსნილ განყოფილებას დღეში დაახლოებით 5-6 ახალი პაციენტი აკითხავს.

[თინათინ ზაზაძე, ახალციხე]