„სამხრეთის კარიბჭეს“ განცხადება [Audio]

უფრო კონკრეტულად, საუბარია ახალციხის მუნიციპალიტეტის ყოფილი გამგებლის მოვალეობის შემსრულებლის ბესიკ ბლიაძის ადვოკატის ნუგზარ სამარჯიშვილის კომენტარზე.

გადაცემის თემა ბესიკ ბლიაძის მისამართით აღძრულ სისხლის სამართლის საქმეს შეეხებოდა. შეგახსენებთ, პროკურატურა ბესიკ ბლიაძეს დოკუმენტების გაყალბებას ედავება. პროკურატურამ ძიება გამგეობის ყოფილი თანამშრომლის, ეკა ტატალაშვილის განცხადების საფუძველზე დაიწყო.

გადაცემის სტუმრებს შორის იყვნენ ნუგზარ სამარჯიშვილი და გამგეობის ყოფილი თანამშრომელი ეკა ტატალაშვილი. ტატალაშვილმა სამარჯიშვილი ცილისწამებაში დაადანაშაულა და მოითხოვა მისგან ბოდიშის მოხდა იმის გამო, რომ მედიაში მას ქურდი უწოდა. რაზეც სამარჯიშვილმა განაცხადა, რომ მას, ტატალაშვილისთვის ქურდი არ უწოდებია. უფრო მეტიც, პროკურატურის მასალებიდან არ ირკვევა ვისი წარდგენილია პროკურატურაში გაყალბებული დოკუმენტები და შესაბამისად, იგი მის შესახებ ასე არ განაცხადებდა და არც მის სახელსა და გვარს ახსენებდა.

მედიაში გავრცელებული ნუგზარ სამარჯიშვილის განცხადება ტატალაშვილის მიერ კანონიერი თუ უკანონო გზით გამგეობიდან გამოტანილ დოკუმეტნზე, გადაცემაში კიდევ არაერთხელ გაჟღერდა. არამხოლოდ სტუმრების, წამყვანის მხრიდანაც.

გადაცემაში კონკრეტულად „სამხრეთის კარიბჭე“ არავის დაუსახელებია, თუმცა, ცალსახად ცხადია, რომ საუბარი „სამხრეთის კარიბჭეზე“ გამოქვეყნებულ სტატიას ეხებოდა, სათაურით: „ახალციხის გამგებელი პასუხისგებაში მისცეს“. ვინაიდან, ბესიკ ბლიაძის საქმე იყო „სამხრეთის კარიბჭეს“ ექსკლუზივი და მთელი დღის განმავლობაში, მაშინ როცა „სამხრეთის კარიბჭეს“ რამდენიმე მასალა ჰქონდა, ამ თემაზე, სხვა მედიასაშუალებას ამის შესახებ ინფორმაცია არ გაუვრცელებია.

„სამხრეთის კარიბჭეს“ სტატია მომზადებულია იმ ინტერვიუზე დაყრდნობით, რომელიც ჟურნალისტმა თამუნა უჩიძემ ნუგზარ სამარჯიშვილთან ჩაწერა. ვინაიდან მისი კომენტარი მსჯელობის საგანი გახდა და გადაცემაში გაჟღერებული ინფორმაცია ლახავს „სამხრეთის კარიბჭეს“ იმიჯს, ვაქვეყნებთ ბლიაძის ადვოკატთან ჩაწერილ ინტერვიუდან იმ მონაკვეთს, რომელიც პროკურატურაში წარდგენილ განცხადებას ეხება.

აქვე, კიდევ ერთხელ აღვნიშნავთ, რომ „სამხრეთის კარიბჭე“ არის ეთიკის ქარტიის ხელმომწერი მედია საშუალება და ყველა ჟურნალისტი მაქსიმალურად ცდილობს პატივი სცეს სიმართლეს და საზოგადოების უფლებას მიიღოს ზუსტი და ამომწურავი ინფორმაცია.



„სამხრეთის კარიბჭეს“ მთავარი რედაქტორი
ნინო ნარიმანიშვილი