ეკა ტატალაშვილი: 'გამგეობიდან დოკუმენტები არ მომიპარავს'

ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე პასუხისგებაში მას შემდეგ მისცეს, რაც გამგეობაში კადრებისა და საქმის წარმოების ყოფილმა სპეციალისტმა ეკა ტატალაშვილმა, სამცხე-ჯავახეთის საოლქო პროკურატურას გაყალბებული ბრძანებები წარუდგინა.

როგორც „სამხრეთის კარიბჭესთან“ ბლიაძის ადვოკატმა ნუგზარ სამარჯიშვილმა განაცხადა, ტატალაშვილმა დოკუმენტები გამგეობიდან მოიპარა, მას, ბუნებრივია, ამის უფლება არ ჰქონდა და ამიტომ ბლიაძე აპირებს ტატალაშვილს უჩივლოს.

„რა მოპარვა, რა სისულელეა?! გამგეობიდან დოკუმენტები არ მომიპარავს!“ - აცხადებს ეკა ტატალაშვილი.

მისი თქმით, იგი ყველა დავალებას ახალციხის მუნიციპალიტეტის გამგეობის ადმინისტრაციის სამსახურის უფროსისგან, მაკა სამსონიძისგან ღებულობდა: „სამსონიძე მაძლევდა ბრძანებებს, რომ მომეწესრიგებინა პირადი საქმე და შემეტანა შრომის წიგნაკში დანიშვნა -გათავისუფლება, ასე რომ, მე არაფერი მომიპარავს“.

კითხვაზე, მაშინ როგორ მოხვდა აღნიშნული დოკუმენტები მასთან, გვაპასუხობს: „მეტ კომენტარს აღარ გავაკეთებ, მაგრამ მოპარული ნამდვილად არ მაქვს“.

მაკა სამსონიძე ამჟამად ბიულეტენზეა, ამიტომ მას „სამხრეთის კარიბჭე“ ტელეფონით დაუკავშირდა. სამსონიძემ მომხდართან დაკავშირებით კომენტარის გაკეთება არ ისურვა: „ნუ გავუსწრებთ მოვლენებს, დაველოდოთ გამოძიებას“.

ვიდრე გამოძიება დასრულდება, ახალციხის მუნიციპალიტეტის გამგეობის თანამშრომლები ეკა ტატალაშვილს სასამართლოში შეხვდებიან, ოღონდ სხვა საქმესთან დაკავიშრებით. მან ადგილობრივ თვითმმართველობაში 2013 წლის ბოლოს გამოცხადებული კონკურსის შედეგი გაასაჩივრა. შეგახსენებთ, ტატალაშვილმა კონკურსი ვერ გაიარა.

„სასამართლოს დაახლოებით თებერვლის ბოლოს მივმართე. კონკურსზე ჩემი ცოდნის დონე არ შეუმოწმებიათ, ამიტომ იმის თქმა, რომ თითქოს კუნკურსი ვერ გავიარე არასწორია. რა ვერ უნდა გამევლო, ის გასაუბრება, სადაც მხოლოდ ჩემი ოჯახური მდგომარეობის შესახებ მკითხეს?!“ - კითხულობს ტატალაშვილი.

შეგახსენებთ, რომ ახალციხის მუნიციპალიტეტის ყოფილ გამგებელს ბრალი24 მარტს წაუყენეს. მას ბრალი სსკ-ის 341-ე მუხლით ედება, რაც სამსახურეობრივ სიყალბეს გულისხმობს. 25 მარტს ახალციხის რაიონულმა სასამართლომ ბლიაძეს გირაო 4,000 ლარი შეუფარდა. ამავე დღეს გამოიტანა გადაწყვეტილება მისი უფლებამოსილების შეჩერების შესახებ.

[თამუნა უჩიძე, ახალციხე]