გამგებლის პროცესზე ის მოწმეები დაკითხეს, რომელთა ბრძანებების გაყალბებაშიც მას ადანაშაულებენ

დღეს, 25 ივლისს, ახალციხის მუნიციპალიტეტის ყოფილი გამგებლის ბესიკ ბლიაძის მორიგი სასამართლო პროცესი გაიმართა.

ბრალდებისა და დაცვის მხარის შეკითხვებს, ამჯერად, ახალციხის მუნიციპალიტეტის ყოფილი გამგეობის შესყიდვების სამსახურის სპეციალისტებმა მანანა ბალიაშვილმა და ქეთევან ინასარიძემ უპასუხეს. ბესიკ ბლიაძეს ბრალი სწორედ მათი და მათთან ერთად კიდევ ორი თანამშრომლის ბრძანებების გაყალბებაში ედება.

ბლიაძის ადვოკატის ნუგზარ სამარჯიშვილის განცხადებით, აღნიშნული მოწმეების დაკითხვა დაცვის მხარისთვის განსაკუთრებით მნიშვნელოვანი იმ თვალსაზრისით იყო, რომ მას სურდა გაერკვია, გამგებელმა თანამშრომლებს სამსახურში დანიშვნის ბრძანებები პირადი მოტივით ხომ არ გაუგრძელა.

„341 მუხლის მაკვალიფიცირებელი ნიშანი, რომლითაც ბრალი ედება ბლიაძეს, სამსახურეობრივი სიყალბე გამოწვეული ანგარებით ან პირადი მოტივით უნდა იყოს, სწორედ ასეთ შემთხვევაშია ეს ქმედება დასჯადი“, - აცხადებს სამარჯიშვილი.

მისი თქმით, მის მიერვე დასმულ კითხვაზე, მაშინ როცა ბალიაშვილს და ინასარიძეს სამსახურში მუშაობის ვადა ეწურებოდათ, ხომ არ სცადეს რაიმე ფორმით გამგებლისთვის სამსახურში დარჩენა ეთხოვათ, განაცხადეს რომ არა.

„მანანა ბალიაშვილმა გვიპასუხა, რომ ახლაც არ იცნობს ბესიკ ბლიაძეს პირადად. ქეთევან ინასარიძემ კი თქვა, რომ გამგებელთან საუბარი მხოლოდ სამსახურეობრივ თემებზე ჰქონდა“, - ამბობს სამარჯიშვილი.

მისივე თქმით, როგორც მოწმეებმა დარბაზში განაცხადეს, თუ მაშინ ბლიაძე მათ გაათავისუფლებდა, შემცვლელის მოძებნა სწრაფად ვერ მოხდებოდა და ამის გამო ის დარგი, რომელშიც მუშაობდნენ, რაღაც პერიოდი ჩავარდებოდა.

„გამოდის, რომ ბლიაძეს გამგეობის კარგად მუშაობაში ადანაშაულებენ“, - აცხადებს სამარჯიშვილი.

მომავალი სასამართლო სხდომა 7 აგვისტოს16:00 საათზე ჩაინიშნა.

შეგახსენებთ, რომ ახალციხის მუნიციპალიტეტის ყოფილ გამგებელს ბრალი 24 მარტს წაუყენეს. მას ბრალი სსკ-ის 341-ე მუხლით ედება, რაც სამსახურეობრივ სიყალბეს გულისხმობს. 25 მარტს, ახალციხის რაიონულმა სასამართლომ ბლიაძეს გირაო 4,000 ლარი შეუფარდა. ამავე დღეს გამოიტანა გადაწყვეტილება მისი უფლებამოსილების შეჩერების შესახებ.

[თამუნა უჩიძე, ახალციხე]