ახალციხეში ცენტრალურ სტადიონის აღდგენა დაიწყო

ახალციხის მუნიციპალიტეტის 2014 წლის ადგილობრივ ბიუჯეტში მიხეილ იაძის სახელობის ცენტრალური სტადიონის აღდგენა-რეაბილიტაციისთვის 300 ათასი ლარია გათვალისწინებული. ადგილობრივმა ხელისუფლებამ სპორტული ინფრასტრუქტურის განვითარება წელს ერთ-ერთ პრიორიტეტად დაასახელა.

აღნიშნული თანხით დაგეგმილია ცენტრალურ სტადიონზე მაყურებელთა დასაჯდომი ადგილების გაკეთება. ასევე, უნდა გაიწმინდოს და მოწესრიგდეს სტადიონი და მისი მიმდებარე ტერიტორია.

„გვინდა, რომ თანამედროვე სტანდარტების შესაბამისი სკამები დავდგათ. გარდა ამისა, გაკეთდება VIP-ლოჟები. დაგეგმილია ღობის აღდგენა-რეაბილიტაცია“, - ამბობს ახალციხის მუნიციპალიტეტის საკრებულოს თავმჯდომარე ოლეგ სანდროშვილი.

აღნიშნული სამუშაოების პარალელურად ახალციხის ცენტრალურ სტადიონზე საქართველოს მძლეოსნობის ეროვნული ფედერაცია დაახლოებით მილიონ-ნახევრიან ინვესტიციას გეგმავს. მძლეოსნობის ფედერაციას სტადიონის 50 პროცენტიანი წილი გასულ წელს გადაეცა. ოლეგ სანდროშვილის განმარტებით, ჩამოყალიბდა არაკომერციული არამომგებიანი იურიდიული პირი (ააიპ), რომლის ხელმძღვანელიც სამცხე-ჯავახეთის მძლეოსნობის ფედერაციის პრეზიდენტი ზიგმუნდ ზილბერშტეინია.

„ეს იქნება მრავალფუნქციური სტადიონი, რომელიც მოემსახურებ სპორტის ბევრ სახეობას. უკვე გავაგზავნეთ მოთხოვნა, რომ 2016 წელს ახალციხეში მძლეოსნობაში ევროპის ჩემპიონატი ჩატარდეს. ჯერ თანხმობა არ მიგვიღია, მაგრამ თუ 2016 წელს არ ჩატარდება, მომდევნო წელსაც მოვითხოვთ“, - განმარტავს ზიგმუნდ ზილბერშტეინი.

მისივე თქმით, ამ ეტაპზე მიხეილ იაძის სახელობის ახალციხის ცენტრალურ სტადიონზე საპროექტო სამუშაოები იწყება.

„პირველადი სამუშაოები შესრულებულია, ნიადაგის ექსპერტიზა ჩავატარეთ, აზომეს და დაათვალიერეს ტრიბუნები და ყველა შენობა-ნაგებობი, რომელიც უნდა გაკეთდეს. ახლა საპროექტო სამუშაოები იწყება, რის შემდეგაც გამოცხადდება ტენდერი და სარეაბილიტაციო სამუშაოებს ტენდერში გამარჯვებული კომპანია შეასრულებს“, - ამბობს ზილბერშტეინი.

საქართველოს მძლეოსნობის ეროვნული ფედერაცია სტადიონის ტერიტორიაზე არსებული სასტუმროს რეაბილიტაციასაც გეგმავს. ასევე გაკეთდება კვების ობიექტიც.

ახალციხის მუნიციპალიტეტის საკრებულოს თავმჯდომარის ოლეგ სანდროშვილის თქმით, ადგილობრივი ხელისუფლების სურვილია, რომ ახალციხეში საცურაო აუზიც გაკეთდეს.

„ეს იქნება 25 მეტრიანი დახურული აუზი, რომელიც ახალციხის სპორტსკოლის ტერიტორიაზე გაკეთდება“, - განმარტავს ზიგმუნდ ზილბერშტეინი.



[თამარ თოთაძე, ახალციხე]